Tamyz aıynyń 9-12-si kúnderi aralyǵynda ótken básekede hokkeıden Qazaqstannyń ulttyq quramasy, elordanyń «Barys» klýby men Qurlyqtyq hokkeı lıgasynyń ókilderi «Amýr» jáne «Neftehımık» komandalary baq synady. «Barys Arena» muz saraıynda ótken týrnırdiń sońǵy kúninde Habarovskiniń «Amýr» komandasy Nıjnekamskiniń «Neftehımık» klýbymen oınap, 2:1 esebimen basym tústi. «Amýr» hokkeıshileri bul jeńisten soń jalpy sany úsh oıynda jeti upaı jınap, topta birinshi oryn ıelenip qana qoımaı, Prezıdent kýboginiń jeńimpazy atandy. «Neftehımık» júldeli ekinshi oryndy qanaǵat tutty.
Al Astananyń «Barys» hokkeı klýby úsh oıynnyń bireýinde jeńiske jetip, úshinshi satyǵa turaqtady. «Barys» alǵashqy oıynda «Amýr» komandasyn jeńgenimen, qalǵan eki matchta «Neftehımık» jáne Qazaqstannyń ulttyq quramasynan jeńildi. «Barys» sońǵy oıynyn Qazaqstan ulttyq quramasynyń hokkeıshilerine qarsy ótkizip, tartysqa toly ótken kezdesýde 3:4 esebimen overtaımda ese jiberdi. «Barys» komandasyna jýyrda ǵana bas jattyqtyrýshy bolyp taǵaıyndalǵan Andreı Skabelkı úshin Prezıdent kýbogi alǵashqy týrnır boldy.
Eske sala keteıik, ótken jylǵy Prezıdent kýbogi úshin halyqaralyq jarysta «Neftehımık» komandasy top jarǵan bolatyn. Bıyl atalǵan komandany «Barys» klýbynyń eks-jattyqtyrýshysy Andreı Nazarov jattyqtyrady.
Álı BITО́RE,
«Egemen Qazaqstan»
