Jobanyń basty maqsaty – bilimdi ári belsendi jastardyń shyǵarmashylyq áleýetin shyńdaý. Olardyń mádenı jáne kásibı qabiletin arttyryp, jeke tulǵa retinde qalyptasýyna barynsha jaǵdaı jasaý. «Týǵan jer» jazǵy jastar lageri osy sharaǵa qatysýshylar úshin qyzyqty ómirlik tájirıbe alýyna jáne ár azamattyń jańa qyrynan tanylýyna septigin tıgizetin biregeı múmkindik.
Bul kúnderi Almaty oblysy, Talǵar aýdanynyń Besqaınar aýylyndaǵy shıpajaıda jınalǵan 16-35 jas aralyǵyndaǵy 150 azamat Alataýdyń bókterindegi ásem tabıǵat aıasynda óz ýaqyttaryn mándi ári maǵynaly, qyzyqty ári tıimdi etip ótkizýde. Belsendi jastar túrli salada jemisti eńbek etip, elimizdiń eleýli tulǵalaryna aınalǵan óz zamandastarymen kezdesip, túrli taqyrypta pikir almasýda. Sonymen qatar olardy aldaǵy kúnderi túrli sheberlik sabaqtary men trenıngter, fýtbol jáne voleıbol básekeleri, KVN saıysy, zııatkerlik «breın-rıngter», mafııa oıyndary jáne taǵy basqa sporttyq jáne shyǵarmashylyq jarystar kútýde.
– Almaty turǵyndarynyń teń jartysyna jýyǵyn 16-35 jas aralyǵyndaǵy azamattardyń quraıtyny jasyryn emes. Biz jalyndy, daryndy, aqyldy, bilimdi, qabiletti, kreatıvti jastardyń áleýetin arttyryp, jan-jaqty damýyna barynshy jaǵdaı jasaýdy kózdep otyrmyz. Osy jospardy júzege asyrý úshin olardyń basyn qosatyn ortaq alań qajet boldy. Bul ıdeıany Almaty qalasynyń ákimdigi tolyqtaı qoldady. Túrli uıymdar men kompanııalar da ıgi isten syrt qalǵan joq. Osylaısha, Alataý bókteriniń eń kórikti jerleriniń birinde ornalasqan shıpajaıda «Týǵan jer» jastar lageri quryldy. Ol jerde jastar ózara oı bólisip, pikir almasady. Túrli ıdeıalar týyndap, solardy júzege asyrýdyń joldary qarastyrylady. Bul jobanyń tıimdi jaqtary óte kóp. Byltyr sol jerde jastar lageriniń alǵashqy jıyny ótse, bıyl taǵy da basqosyp otyrmyz, – deıdi Jastar qoǵamdyq qorynyń atqarýshy dırektory Birjan Qazturǵanov.
18 tamyzǵa deıin sozylatyn aıtýly shara baǵdarlamasynda jastardyń belsendi demalysynan bólek, elimizdiń tanymal qaıratkerleri men kásipkerleri, akterler men ánshiler jáne sportshylar qaýymymen kezdesýler uıymdastyrylýda.
Ǵalym SÚLEIMEN,
«Egemen Qazaqstan»
