Eldiń biletini – kezinde shahtalarǵa aty berilgen Ivan Kostenko, Túsip Kúzembaev esimderi ǵana. Al eleýsiz qalǵan basqalary qazir atalmaıdy da. Bir kezde ataǵy dúrildegen Sosıalıstik Eńbek Eri Janseıit Əbdirahmanov ta solardyń biri edi.
Janseıit Əbdirahmanov 1900 jyly Qarqaraly aýdanynda dúnıege kelgen. Jastaıynan jergilikti baıdyń jalshysy bolyp, mal baqqan. Qazaq aýyldaryn ujymdastyrý naýqany júrip jatqan 1929 jyly eti tiri jigit Semeı qalasyna baryp, baltashylyq kəsippen aınalysady. Al 1938 jyly otbasymen Qaraǵandyǵa kelip, endi salynyp jatqan «Gıgant» shahtasyna (qazirgi Kostenko atyndaǵy shahta) jumysqa ornalasqan. Bul shahta, qurylysy tolyq aıaqtalmastan, 1942 jyly iske qosylǵanda Janseıit óndiristik eńbektiń bel ortasynda júrdi.
Uly Otan soǵysynyń aýyr jyldarynda elimizge Qaraǵandynyń qara altyny aýadaı qajet bolǵany belgili. Qıyn-qystaý ýaqytta qajyrqaıratymen, eńbekqorlyǵymen tanylǵan Janseıit kenshiler ujymynyń aldy boldy, əý bastan meńgergen tireýshi mamandyǵynyń sheberi edi. О́zine júktelgen mindetti minsiz atqaryp, jospardy ərdaıym asyra oryndady. Soǵys jyldarynda Kostenko atyndaǵy shahtanyń kenshileri 428, 6 myń tonna kómir óndirdi. Janseıit Əbdirahmanovtyń qajyrly eńbegi ədil baǵalanyp, KSRO kómir ónerkəsibi mınıstrliginiń, Qazaq KSR Joǵarǵy Keńesiniń Qurmet gramotalarymen, «Eren eńbegi úshin» medalimen marapattaldy.
1948 jyldyń 28 tamyzynda KSRO Joǵarǵy Keńesi Prezıdıýmynyń jarlyǵymen kómir óndirýdi eselep ulǵaıtqany, óndiriske jańa ozyq tehnologııalardy engizgeni jəne eńbek ónimdiligin barynsha arttyrǵany úshin Janseıit Əbdirahmanovqa Sosıalıstik Eńbek Eri ataǵy berildi. J.Əbdirahmanov 1957 jyly zeınet demalysyna shyqqansha osy Kostenko atyndaǵy shahtada eńbek etti.
Ol kisiniń qola músini ken ornynyń murajaıynda tur. Halyq ıgiligi jolyndaǵy eńbekke, patrıottyq rýhtaǵy tərbıe úshin osyndaı jandardyń tulǵasyn búgingi urpaqqa úlgi etý asa mańyzdy. Kostenko atyndaǵy shahtanyń ujymy qazirgi ýaqytta bılik oryndaryna arnaıy usynys hat jazyp, Qaraǵandy qalasynyń bir kóshesine Janseıit Əbdirahmanov esimin berýdi surap otyr. О́te oryndy usynys. Kenshiler qalasy men kómir óndirisiniń órkendeýine zor úles qosqan tulǵa bul qurmetke əbden laıyq dep bilemiz. Jergilikti bılik pen onomastıkalyq komıssııa kenshiler ujymynyń tilegin oryndaıdy degen úmittemiz.
Qaırat ÁBILDA,
«Egemen Qazaqstan»
QARAǴANDY
