«Qazgıdromet» RMK málimetine sáıkes, 20 tamyz ben 21 tamyz aralyǵynda Astananyń oń jaǵalaýynda 36 mıllımetr, al sol jaǵalaýynda 45 mıllımetr jaýyn jaýǵan. Bul aılyq normadan 40 prosentke artyq. Munshama kóp mólsherdegi jaýyn saldarynan qalanyń káriz júıesindegi aqaýlar taǵy da syr bergendeı. О́ıtkeni jańbyr sýyn azaıtýǵa 11 tazartý qurylǵysy, 2 sý sorǵysh, 11-ge jýyq sorǵy stansasy, 110 assenızatorlyq mashına jáne basqa da tehnıkalar jumyldyrylǵan. Aıdap qotarylǵan sýdyń kólemi saǵatyna 50 myń tekshe metrdi quraǵan. Biraq kósheniń sýaǵarlary áýelden durys salynbaǵandyqtan munshama árekettiń kómegi az bolǵandaı. Jaýyn sýyn qabyldaýshy tehnıkalar úlgermeı, Nájimedenov, Táýelsizdik, Momyshuly kósheleriniń biraz bóligin sý alyp ketken. Tek tańǵy 5-ke jýyq atalmysh kóshelerden sýdy soryp, tazartý múmkin bolǵan.
«Mamandandyrylǵan kásiporyndar men kommýnaldyq kásiporyndar osy ýaqyt aralyǵynda táýlik boıy damylsyz jumys istedi», degen Astana qalasy ákiminiń orynbasary Q.Aıtmuhametov kóshelerdi sý alyp ketý jaǵdaılaryna jol berilgeni úshin halyqtan keshirim de surady. «OKQ alańyn paıdalanyp, qala halqyna alǵys aıta otyryp, keshirim suraǵymyz keledi. Sý alyp ketý jaǵdaılaryna jol berildi. Eki saǵattyń ishinde másele retke kelgenimen, báribir jaǵdaıdyń oryn alǵanyn jasyra almaımyz», dedi ol.
Álsiz tusy áshkerelendi degen osy shyǵar, bas qalanyń bas kóshelerindegi nóser kárizderiniń júıesi durys esepke qurylmaǵandyǵy taǵy da dáleldendi. Sebebi elorda kóshelerin sý basý, ókinishke qaraı, bul birinshi ret emes edi.
«Turan» dańǵyly men «Uly Dala» kósheleriniń qıylysyn sý alyp ketýine jobalaý kezindegi qatelik sebep bolyp otyr. Sý irkýishtiń aýmaǵy durys eseptelmeı, osy sebepti qýattylyǵy tómen sý sorǵylar ornatylyp qoıǵan», dedi Q.Aıtmuhametov. Ákimniń orynbasary endigi kezekte atalmysh ýchastokti jańǵyrtý jumysy júrgizilgeli jatqanyn atap ótti. «Tazartý qurylymdaryn basqarý – shtatty basqarý júıesinde. Biz ol jerde qosymsha TJK bólimsheleriniń qozǵalmaly sorǵyly stansalaryn ornattyq. Sonymen qatar atalǵan nysan jańǵyrtý boıynsha joba bastaldy. Jumys 2019 jyly bastalyp, 2020 jyly aıaqtalady», dedi ákimdik ókili.
Málimetke súıensek, búginde qaladaǵy nóserlik kárizder júıesi 13 tazalaý qurylǵysynan jáne 3 saqtaý toǵanynan, 18,9 myń baqylaý jáne jańbyrsýy qudyqtarynan, 398,8 shaqyrymǵa tarta magıstraldy kollektorlarynan jáne naýa aryqtar júıesinen turady. Olar 12,93 myń gektar aýmaqta jınalǵan jaıylma sýdyń ketýin qamtamasyz etedi. Tazartý qurylǵylarynyń jıyntyq qýattylyǵy táýligine 215,46 myń tekshe metrdi quraıdy. Al elordada 2016 jylǵa deıin tek 9 tazartý nysany men 3 toǵan jınaqtaýshy bolǵan.
Aıtqandaı, Astana kóshelerin sý basqandyǵy jónindegi aqparattar ádettegideı áleýmettik jelilerde tez taraǵany málim. Sonyń ishinde aıryqsha tanymal bolǵany – elorda kóshesinde sýdy belshesinen keshken qoǵamdyq kólik – salony jolaýshyǵa toly avtobýs edi. Brıfıng barysynda sol avtobýstyń júrgizýshisi jumystan shettetilgeni aıtyldy. Bul týraly jýrnalıster suraǵan soń Astana qalasy ákiminiń orynbasary Qosman Aıtmuhametov málimdedi.
«Avtobýs júrgizýshisine ol jaqqa barmaý kerektigi eskertilgen. Onyń ústine ol jaǵdaıdy jaqsy bilgen. Adamdarmen kele jatqanyn eskerýi kerek edi. Biz kósheni jaýyp tastap, patrýldik kólikti, qorshaýdy qoıdyq. Almaty aýdany ákimdiginiń qyzmetkerleri oǵan keri burylýdy suraǵan edi. Biraq ol tyńdamaı ári qaraı júre bergen. Ol aınalyp ótýi kerek edi. Momyshuly kóshesine Toqpanovty aınalyp óte alar edi. Basqa júrgizýshiler aınalyp ótken. Al atalmysh avtobýstyń júrgizýshisi olaı etpegen. Onyń endigi jumysta qalý-qalmaýyn «Astana LRT» basshylyǵy sheshedi», dedi Q.Aıtmuhametov.
Dınara BITIK,
«Egemen Qazaqstan»
