Is-sharaǵa Parlament depýtattary, ortalyq memlekettik organdardyń, Reseı, Túrkııa, Bolgarııa, Latvııa, Grýzııa jáne basqa da elderdiń konstıtýsııalyq baqylaý organdarynyń, sot jáne quqyq qorǵaý mekemeleriniń basshylary, halyqaralyq uıymdardyń, Qazaqstannyń ǵylymı qaýymdastyǵynyń ókilderi, sondaı-aq taıaý jáne alys shetelderdegi quqyq salasynyń sarapshylary qatysty.
G.Ábdiqalyqova konferensııaǵa qatysýshylarǵa Qazaqstan Prezıdenti Nursultan Nazarbaevtyń quttyqtaý hatyn oqyp berdi. Onda 1995 jyly qabyldanǵan Konstıtýsııa Qazaqstan memlekettiligi damýynyń irgetasyn qalaǵany, adam quqyqtary men bostandyqtaryn bekemdegeni atap ótilgen. Halyqaralyq qoǵamdastyq moıyndaǵan qazaqstandyq qoǵam damýynyń biregeı modeli qoǵamdyq kelisim men turaqtylyq, ekonomıkalyq damý jáne Qazaqstan halqynyń ortaq taǵdyry týraly konstıtýsııalyq erejelerdiń qaltqysyz saqtalýy arqasynda múmkin boldy.
– Quqyq ústemdigi, Konstıtýsııanyń bıik mártebesi, zań bıligi – Qazaqstannyń búgingi tańdaǵy tabysty damýynyń jáne onyń zamanaýı álemde laıyqty orynǵa ıe bolýynyń asa mańyzdy máselesi. Qazirgi Konstıtýsııanyń áleýeti Qazaqstannyń odan ári damýyna jáne álemniń ozyq damyǵan otyz eliniń qataryna kirýine uzaq jyldar qyzmet etetinine kámil senemin, – delingen Qazaqstan Prezıdentiniń quttyqtaýynda.
Konferensııaǵa qatysýshylar sóılegen sózderinde Qazaqstannyń konstıtýsııalyq qurylymyndaǵy Memleket basshysynyń asa mańyzdy rólin atap ótip, «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty joldaýdy júzege asyrý, sondaı-aq Astananyń qalyptasý jáne damý máselelerin talqylady.
