Álemdegi básekege qabiletti ozyq otyz eldiń qatarynan oryn alýdy maqsat tutqan memleketimizde damýdyń bir baǵyty retinde sybaılas jemqorlyqsyz qoǵam qurý mindeti turǵany belgili. Tek Qazaqstanda ǵana emes, álem boıynsha tamyryn jaıyp, túp-tamyryn joıyp jiberýge kúsh bermeı kele jatqan jemqorlyq derti, ozyq elderdiń qatarynan myqtap oryn tebýge kedergi keltirip, qolbaılaý bolýda. Ár el bul keselmen túrli ádis-aılamen kúresýde.
Osy baǵytta Ulttyq kitaphanada «Sybaılas jemqorlyq týraly siz bilýge tıis málimet» taqyrybynda sholý, «Sybaılas jemqorlyqqa qarsy kúres jáne zań ústemdigi» taqyrybynda kezdesý, «Jemqorlyqpen kúresý» bezendirilgen kitap kórmesi jáne t.b. sharalar turaqty uıymdastyrylyp turady. Stýdentter men jastardyń rýhanı ordasyna aınalǵan kitaphana mamandary úshin basty maqsat kelýshi oqyrmandarǵa, oqýshy, stýdentterge sybaılas jemqorlyq maǵynasyn túsindirý, jemqorlyqtyń beleń almaýyna jol bermeý jaıly keńinen aqparat berý.
QR Ulttyq kitaphanasynyń baspasóz hatshysy Aısulý Tájibaevanyń málimeti boıynsha, «Rýhanı jańǵyrý» baǵdarlamasy aıasynda jastardy rýhanı jańǵyrýǵa shaqyrý maqsatynda kitaphana janynan ashylǵan «Yntymaq» birlestigi de sybaılas jemqorlyqqa qarsy nasıhat jumystaryn júrgizýde. Aldaǵy ýaqytta da parasat ordasynda jemqorlyq dertin aldyn alýǵa baılanysty túrli kórmeler men is-sharalar ótkizý josparlanǵan.
Mamandardyń zertteýleri boıynsha, elimizde sybaılas jemqorlyqty týdyryp otyrǵan sebepterdiń jan-jaqty anyqtalmaýy saldarynan oıdaǵydaı nátıjege qol jetkize almaı otyrmyz. «TransPerensı Interneıshnl» uıymynyń reıtıngisinde elimiz 180 eldiń arasynda 122-shi orynda tur». Sybaılas jemqorlyq - ultymyzdyń qaýipsizdigine, elimizdiń halyqaralyq bedeline, azamattardyń konstıtýsııalyq quqyqtary men bostandyqtaryna eleýli nuqsan keltiretin qaýipti qubylys ekeni, al onymen kúres tek zań qyzmetkerleriniń ǵana jaýapkershiligi emes, qalyń buqaranyń da azamattyq mindeti ekendigin túsindirý kitaphanada ótetin sharalar barysynda únemi aıtylyp keledi.
Elvıra Serikqyzy,
«Egemen Qazaqstan»
