Almaty qalasyndaǵy Túrkııanyń Bas konsýldyǵymen birlese uıymdastyrylǵan is-shara barysynda Berdibek Soqpaqbaevtyń «Meniń atym - Qoja», Taıyr Jomartbaıulynyń «Qyz kórelik», Spandııar Kóbeevtiń «Qalyń mal», Mirjaqyp Dýlatulynyń «Baqytsyz Jamal», Sultanmahmut Toraıǵyrovtyń «Qamar sulý» romanynyń túrik tiline aýdarylǵan nusqalary tanystyryldy.
Ulttyq kitaphananyń dırektory Janat Seıdýmanov tusaýkeser rásimine kelip otyrǵan qonaqtarǵa qazaq-túrik yntymaqtastyǵy aıasynda jasalyp jatqan ıgi ister barysyna toqtaldy. Kórnekti qazaq qalamgerleri kitaptarynyń túrik tiline jáne túrik jazýshylarynyń shyǵarmalary qazaq tiline aýdarylyp, jaryq kórýi baýyrlas halyqtar arasyndaǵy rýhanı qazynanyń qory tolyǵyp jatqandyǵy, dep atap ótti.
Is-sharanyń ary qaraı júrgizgen Naǵashybek Qapalbekuly sóz kezegin Ankara qalasyndaǵy Kechıoren aýdanynyń ákimi Mýstafa Ak myrzaǵa usyndy. Mádenı baılanystarynyń túp-tamyry tereńde jatqan eki memleket búginde osy óristi yntymaqtastyqtyń aıasyn jyldan-jylǵa keńeıtip keledi, dep atap ótti. Súıinbaı aqynnyń 200 jyldyǵyna oraı Súıinbaı eskertkishi ornatylyp, Kechıoren aýdanynyń bir kóshesine qazaqtyń uly aqyny Jambyl Jabaevtyń aty berilgeni osy mádenı baılanystardyń jalǵasyndaı. Endigi kezekte yntymaq aıasy kitap isi salasynda órkendeýde. Onyń dáleli retinde tanystyrylymy ótip otyrǵan qazaq klassıkteriniń eńbekterin atap ótýge bolady.
Odan keıin sóz alǵan Almaty qalasyndaǵy Túrkııanyń Bas konsýly Ryza Qaǵan Iylmaz zııaly qaýymǵa ystyq yqylasyn bildirip, qazaq qalamgerleriniń kitaptaryn túrik tiline aýdarýǵa qoldaý bildirgen Kechıoren aýdany ekendigin atap ótip, alǵysyn bildirdi.
Al óz kezeginde Almaty oblysy Jambyl aýdanynyń ákimi Baǵdat Álıev osy iske bastamashy bolyp, basy-qasynda júrip ıgi nátıjelerge birlese qol jetkizgen azamattarǵa alǵys bildirip, erteńgi kúni Jambyl aýdanynda Kechıorın kóshesiniń ashylý saltanaty ótetinine jáne kópshilik osy ıgi sharaǵa qurmetti qonaq bolýǵa shaqyrdy.
Atalǵan jobalardy júzege asyrýǵa múddeli TEDA jobasy aıasynda sonymen qatar túrik jazýshylarynyń da eńbekteri qazaq tiline aýdarylǵan. TEDA jobasynyń jetekshisi baspager Shaızada Muhamedjanova bıylǵy jyly qazaq tiline aýdarylǵan túrik qalamgerleri kitaptarynyń alǵashqy nusqasymen tanystyryp, baspahanalarmen kelisimder júrip jatqandyǵyn jetkizdi.
Osy ıgi sharaǵa professor Dandaı Ysqaq, jazýshy Berik Shahanov, aqyn Amanhan Álim, jazýshy-dramatýrg Ahmetjan Ashırı, belgili mádenıet qaıratkerleri, BAQ ókilderi jáne t.b. qatysty.
Shara aıasynda Ulttyq kitaphananyń qorynan «Qazaqstan-Túrkııa: rýhanı jańǵyrýdyń jańa baǵytynda» kitap kórmesi uıymdastyryldy. Kórmege Qazaqstan men Túrkııanyń dostyǵy, tarıhı-mádenı baılanystary, qazaq-túrik aqyn- jazýshylarynyń kitaptary qoıyldy.
Elvıra Serikqyzy,
«Egemen qazaqstan»
ALMATY
