Keshe jeńil atletıkadan 400 metrge aralas estafetadan júgirýden Qazaqstan quramasy qola medal jeńip aldy. Komanda quramynda Svetlana Golendova, Dmıtrıı Koblov, Elına Mıhına jáne Mıhaıl Lıtvın júgirdi. Mundaı aralas estafeta Azııa oıyndarynyń baǵdarlamasyna alǵash ret engizilip otyr. Birinshi oryndy Bahreın quramasy ıelense, ekinshi orynǵa Úndistan sportshylary turaqtady – 3:15.71. Osylaısha jeńilatletter úshinshi qolaǵa qol jetkizdi.
Al ekinshi qola júldeni veloshabandoz Artem Zaharov ıelendi. Ol 4 shaqyrymdyq jekeleı jarysta máre syzyǵyn úshinshi bolyp kesti. Altyn medaldy Ońtústik Koreıa ókili Pak San Hýn, kúmis júlde japonııalyq Rıo Chıkatanıge buıyrdy. Zaharov Azııa oıyndaryna ekinshi ret qatysqanymen, birinshi ret júlde alyp otyr.
Onynshy jarys kúnindegi úshinshi jáne tórtinshi qolany dzıýdoshylar ıelendi. Rıo Olımpıadasynyń qola júldegeri Otgonseseg Galbadrah jubanysh beldesýinde qytaılyq balýan Ia Hııongpen jolyǵyp, ıppon ádisimen jeńiske jetti. 48 kılo salmaqta beldesken Otgonseseg Galbadrah shırek fınalda Soltústik Koreıa sportshysy Iý Sýn Jondy kedergisiz utyp, jartylaı fınalda japon qyzy Amı Kondodan jeńilip qalǵan-dy.
66 kıloda synǵa túsken dzıýdoshy Eldos Jumaqanov qola medal úshin ótken kúreste qatarlyq balýanmen beldesip, merziminen buryn ıppon ádisimen jeńiske jetti. Eske sala keteıik, Azııa oıyndarynyń jartylaı fınalynda jerlesimiz japondyq sportshyǵa ese jibergen edi. Osylaısha dzıýdo sportynan jarystyń alǵashqy kúninde balýandarymyz eki qola medal aldy. Búgin erler arasynda 73 jáne 81 kılo salmaqtaǵy balýandar, al qyzdar arasynda 57, 63 jáne 70 kılodaǵy sportshylar synǵa túsedi.
Azııa oıyndarynda altyn júldeden basty úmitker atanǵan Eldos Smetov (60 kg) tórt jyl burynǵy ataǵyn qorǵaı almady. 2014 jylǵy Inchhon Azıadasynyń jeńimpazy alǵashqy aınalymda ındonezııalyq balýandy «ıppon» ádisimen jeńip, kelesi kezeńge ótken-di. Degenmen, Smetov ekinshi aınalymda Soltústik Koreıa sportshysynan jeńilip qaldy. Beldesýden keıin Eldostyń jaraqatpen kúreskeni anyqtalyp, jubanysh beldesýine shyqqan joq.
О́kinishke qaraı, el qorjynyna altyn júlde salady degen boksshylarymyz da fınalǵa jetpeı súrinip jatyr. Boksshylardyń alǵashqy kúninde álem chempıony Qaırat Erálıev (56 kg) jarys jolynan shyǵyp qalǵanyn jazǵan bolatynbyz. Endi, mine shırek fınaldyq saıysta 49 kıloda judyryqtasqan Temirtas Júsipov pen 52 kılodaǵy Azat Mahmetov Fılıppın boksshylarynan jeńilip qaldy. Al Samatáli Tóltaev (60 kg) 2017 jylǵy Azııa chempıony qytaılyq Shan Iýnge ese jiberse, Bekdáýlet Ibragımov (64 kg) Taıland boksshysyn jeńe almady. Sondaı-aq Azııa oıyndaryna barǵan úsh boksshy arýymyz shırek fınalda jeńildi. Shırek fınalǵa irikteýsiz ótken Rımma Volosenko (60 kg) men 57 kıloda Sánııa Sultanqyzy Taıland boksshysyn, al álemniń eki dúrkin chempıony Nazym Qyzaıbaı (51 kg) Qytaı boksshysyn jeńe almady. Jartylaı fınalǵa tek Aslanbek Shymbergenov (69 kg) pen Amanqul Ábilhan (75 kg) shyqty.
Álı BITО́RE,
«Egemen Qazaqstan»
