Bulqynǵan bula bulaqtar

Bul kezdesýlerdiń qatysýshy­lary «Ǵylym men óner kody» atty ashyq respýblıkalyq músin saıysyna nobaılar men maketter jasap jatqan Qazaqstan músinshileriniń shyǵarmashylyq sheberhanasyna barady. Saıys maqsaty – densaýlyq saqtaý salasyndaǵy ınnovasııalyq tehnologııalardy beıneleıtin úzdik nobaılardy kótermeleý. Ornatyl­ǵan músin Shymkent qalasyndaǵy Qazaqstandaǵy farmasevtıkalyq óndirisiniń kóshbasshysy bolyp tabylatyn SANTO kompanııasynyń nyshanyna aınalmaq.

Uıymdastyrýshylar saıysqa qatysýǵa 56 kásibı músinshini jınady. Júldeli orynǵa Almaty men Astananyń ǵana emes, Atyraý, О́skemen, Shymkent qalalarynyń sýretshileri de kúsh synasty. Músin saıysyna qatysýǵa segiz músinshi qyz nıet bildirdi. Negizi, qyzdardyń músinmen aınalasýy óte sırek kezdesetin qubylys. Aǵash oıý, mármár jáne granıtti óńdeý, qola quıý názik jandar úshin óte aýyr jumys sanalady. Gúlfııa Meldesh bul týraly «Qyzdar esh ýaqytta taısalmaı, ózin kórsete alatyn qyzmet túrin tańdaǵany durys dep oılaımyn. Biz óz qabiletimizge senýimiz kerek. Sonda ǵana basqalar bizge senedi!» dedi. Gúlfııa kezdesý­diń sońyna qaraı quralmen jumys isteýdi jáne qolany tegistep ajarlaý ádisin kórsetti. 

Qazaqstan Sýretshiler odaǵynyń múshesi, músinshi Tileýberdi Bınashev Almaty kórkemóner mektebin 1981 jyly bitirgen. Ol monýmentaldy jumystarynda ulttyq óner estetıkasyna negizdeletin ortaazııa­lyq plastıkasynyń kórkem tilin keńi­nen qulpyrtyp paıdala­na­dy. Salttyq baǵana túrinde jasal­ǵan, býyndardyń aýyspalyǵyn bildiretin Tileýberdiniń «Jetiata» atty kompozısııasy Á.Qasteev atyndaǵy memlekettik óner murajaıynyń toptamasynda saqtaýly.

Áke ónerin kórip ósken qyzy Gúlfııa Meldeshtiń skýlptýraǵa degen salqar sezimi bir sát sýyǵan emes. Qyzdyń ónerge degen yntyzarlyǵy aýyp, Qazaq kólik jáne baılanys akademııasynyń qasyndaǵy Muha­medjan Tynyshpaev, Shý stansa­syndaǵy Turar Rysqulov, tanymal akter Asanáli Áshimov músinderiniń avtory bolýy da bekerden-beker emes. Búginde ónerine býyrqanǵan shabyt qosyp, tosyndaý keıipterdi beıneleýi, tyń turpatty músinderdi somdaýy tańǵaldyrady. Ákesi Tileý­ber­diniń saz keshe áspet­teıtin óne­rin kórip ósse de bala kúnnen osy qajyr-qaıratty talap etetin qıyn maman­dyqtyń ózine baýraǵany jumbaq.

Bulqynǵan bula bulaqtar... Kerim bir dúnıe... Sazarǵan saz bal­shyq­tan ózgeshe órnek salyp oı tolǵaý sylqym syrlarǵa jeteleıdi. Aldy­­ńyzdaǵy arnasyn ashyp bul­qyn­ǵan ǵajaıyp móldir bulaq káýsar arna­larǵa aınalyp, jazıraly jaǵa­laýlarǵa jetkende órnekti óner tolqytyp jiberedi. Eı, deısiz sonda... bulqynǵan bula bulaqtar... ǵajap­tyǵyna tańdaı qaǵasyz... net­ken ǵajap dúnıe... átkenshek terbetken bozbala men boıjetken ómirdiń aldyńyzdan shyǵar syrly kúıinde jeteleı beredi.

Músinshi úıiniń aýlasyndaǵy qar­balas bir ómir ózegi, nege ekenin, úzi­lip túskendeı bolyp qalyp qoıdy...  

Saparbaı PARMANQUL, 

«Egemen Qazaqstan»

ALMATY