Áıgerim Aqtileýova, Shymkent qalasy, 2018 jyl
Biz Áıgerimmen Shymkent qalasynyń ortalyǵynda jolyqtyq. Qazir Qazyǵurt aýdany, Qarabastaý aýylyndaǵy ata-enesiniń qolynda turatyn ol Ońtústik Qazaqstan medısına akademııasyna ınternatýraǵa qujat tapsyrý úshin kelgen eken. О́zimen birge 2 jasar qyzy Raıanany da erte kelipti.
– Ol ýaqytta joldasym Meırambek ýchaskelik ınspektor bolyp qyzmet istep júrgen edi. Úılengenimizge bir aı tolar-tolmastan joldasyma oq tıip, qyzmet babynda qaıtys boldy. О́zim Qyzylorda oblysynyń týmasymyn. Polısııa qyzmetkeri bolǵan ákem de kezinde qyzmet babynda qaıtys bolyp, Shymkenttegi naǵashylarymnyń qolynda óstim, – dep eske aldy ótken kúnderi jaıly.
Áıgerimniń aıtýynsha, 2016 jyly Meırambek pen Áıgerim Qazyǵurtta qazaqtyń salt-dástúrine saı úılený toıyn ótkizgen soń, AHAJ-ǵa nekege otyrý úshin tirkelgen. Sol jyly sáýirde kúıeýi Meırambek Almaly aýdandyq IIB-nen bir aı is-tájirıbeden ótken soń, maýsymnyń tórtinde dıplomyn ala sala jumysqa kirisip ketedi.
– Ol kezde M.Ospanov atyndaǵy Batys Qazaqstan memlekettik medısınalyq ýnıversıtetinde oqyp júrgen edim. Qujattarymdy Almatyǵa aýystyrý maqsatynda Aqtóbege kettim. Oǵan deıin aýylda úılený toıymyzdy ótkizgen soń, 12 shilde Qazyǵurt aýdanynyń HQO arqyly Almaty qalasy, Almaly aýdany AHAJ bólimine elektrondy túrde tirkeldik. Tólem túbirtegi saqtaýly, – deıdi Áıgerim.
Áıgerim Aqtileýova qyzy Raıanamen, Shymkent qalasy, 2018 jyl
2016 jyly 18 shilde kúni Almaty qalasynda lańkes Rýslan Kúlekbaevtyń quqyq qorǵaý organy ókilderine jasaǵan atyshýly shabýyly kezinde birneshe polısııa qyzmetkerlerimen birge Meırambek Rahmetýllaev ta oqqa ushty.
– Kúıeýim aýrýhanada 14 kún jatyp, 1 tamyz kúni qaıtys boldy. Neke kýáligi 15 tamyz kúni daıyn bolýy tıis edi. Almaly aýdandyq AHAJ bólimindegiler ótinish berýshiler qatar kelmese, birlesken ótinishtiń qabyldanbaıtynyn aıtyp, shyǵaryp saldy. Osylaısha neke qııý týraly kýálik berilmegen soń, kóptegen áleýmettik kómekterdi der kezinde ala almaı júrmin. Qaıǵyly jaǵdaıdan soń densaýlyǵym nasharlap, bir jyl akademııalyq demalys aldym. Al balam aýrýshań bolyp dúnıege keldi. Qazyǵurt aýdandyq sotyna shaǵymdanyp júrip, qyzymdy ákesiniń atyna jazdyrtyp, týý týraly kýáligin aldym, deıdi Áıgerim.
Turaqty tirkeýde kemi 3 jyl bolý kerek
Marqum Meırambek Rahmetýllaevtiń otbasyna Almaty qalasy ákimdigi 15 mıllıon teńge, qaıtys bolý jaǵdaıy jáne jerleýge arnalǵan ótemaqydan bólek jınalǵan qarajat esebinen 11 mıllıon 500 myń teńge kóleminde bir rettik materıaldyq kómek kórsetken. Biraq Áıgerim Almaty qalalyq ákimdiginiń bul kómegi jetkiliksiz ekenin aıtady. Ol jarynyń qyzmetin atqarý kezinde oq tıgenin, sol oqıǵa kezinde kóz jumǵan ózge áskerı qyzmetshilerdiń otbasyna áleýmettik qamqorlyq retinde Almaty ákimdigi tarapynan baspana berilgenin kóldeneń tartady. Rahmetýllaevtyń zaıyby Almaty qalasynan úı alýǵa kómek berý týraly qala ákimdigine birneshe márte ótinish te joldaǵan. Al Almaty qalasy turǵyn úı jáne turǵyn úı ınspeksııasynyń basqarmasy óz kezeginde olardyń buǵan deıin turǵyn úıge muqtajdar esebinde turmaǵany sebepti úı alý týraly talabynyń negizsiz ekenin alǵa tartyp otyr.
«Muqtajdar esebine qoıý úshin Almaty qalasynda keminde 3 jyl turaqty turýy, sonymen birge menshik quqyǵynda turǵyn úıi bolmaýy talap etiledi», deıdi basqarma basshysynyń orynbasary T. Ábilov.
Biz Ishki ister mınıstrligine de qaıryldyq. Olar «Quqyq qorǵaý qyzmeti týraly» Zańynyń 68 babyna sáıkes qyzmetker qyzmettik mindetin atqarý kezinde qaza tapqan jaǵdaıda qaza tapqan adamnyń otbasy zańnamada belgilengen sharttar men memlekettik turǵyn úı qorynan baspana alýǵa quqyly ekenin aıtady. Ishki ister organdarynda arnaıy úı qory bolmaǵandyqtan mınıstrlik Áıgerim Aqtileýovaǵa úı bólý týraly Almaty ákimdigine qoldaý hat joldaǵan. Áıtse de «turǵylyqty meken-jaı boıynsha turaqty tirkeýde kemi 3 jyl bolý kerek jáne úıge muqtajdar esebinde turýy tıis» degen zań baby jesirdiń aldynan qaıta-qaıta aınalyp shyǵady.
«Áıgerimniń sotqa júginýge tolyq quqyǵy bar»
Áıgerim basyndaǵy kepke qatysty zańger Abzal Quspan turǵylyqty jeri boıynsha sotqa júginýge tolyq quqyǵy bar ekenin aıtady.
«Áıgerimniń joldasy Meırambekpen zańdy nekege turǵanyn dáleldeý úshin Qazaqstan Respýblıkasynyń Azamattyq prosestik kodeksiniń 292-293 baby boıynsha sotqa aryz bere alady. Aryzda toıdaǵy fotolardy, vıdeo materıaldy, kýálerdi kórsetýge bolady», deıdi zańger.
Zańgerdiń sózinshe, Almaty qalasy turǵyn úı jáne turǵyn úı ınspeksııasynyń jaýaby da tolyǵymen zańdy.
– Olar Áıgerim úshin qujat jınaý jumystaryn istep bere almaıdy ǵoı. Áýeli zańdyq nekede bolǵandyǵyn anyqtap alý kerek. Al Áıgerimge tıisti áleýmettik kómekterdi alýy úshin eń aldymen Meırambek Rahmetýllaevtyń nekeli jary ekenin, odan balasynyń bar ekenin sot arqyly anyqtaý kerek. Osyny basshylyqqa ala otyryp, nekede turǵannan bastap bastarynda úı bolmaǵandyǵy týraly anyqtamamen ákimdikke júgine alady. Jaýap berilgen jaǵdaıda ákimshilik jaýabyn sotqa berýge bolady. Bul is bir aıda sheshile qalmaıdy, asyqpaı ret-retimen iske asyrylatyn dúnıe, - dedi.
Arqasúıer azamaty memleketti qorǵaý qyzmeti jolynda qapııada qaza tapqan kelinshektiń búgingi keıpi osyndaı.
P.S: Beıbit kúnniń saqshysy bolǵan almatylyq polıseılerdiń beımezgil qazasy qoǵamda úlken dúmpý týǵyzǵany belgili. Al el tynyshtyǵy jolynda ómirin qurbandyqqa shalǵan qyzmetkerlerdiń sońynda qaıǵy jutyp qalǵan jaqyndaryna jurt bolyp qoldaý kórsetý qoǵamnyń belsendiligine syn. Sondyqtan batyrdyń jaryna kómek qolyn sozyp, qoǵamdyq qoldaý kórsetý bizdiń paryzymyz dep túsinsek, qane...
Aıa О́MIRTAI,
«Egemen Qazaqstan»
Sýretti túsirgen Áıgerim BEGIMBET
