Búgin Parlament Májilisiniń tórtinshi sessııasy óz jumysyn bastady. Nurlan Nyǵmatýlın memleket basshysy tapsyrǵan júktemelerdiń basty mindetterin atady.
«Búgin biz altynshy saılanǵan Parlament Májilisiniń tórtinshi sessııasynyń jumysyn bastap otyrmyz. Elbasy birinshi qyrkúıekte osy sessııany ashyp, elimizdiń damý josparyna sáıkes, naqty tapsyrmalar berdi. Bizdiń basty maqsatymyz - Prezıdenttiń júktegen mindetterin óz ýaqytynda sapaly zańdarmen qamtamasyz etý. Onyń ishinde Memleket basshysynyń jańa tapsyrmalaryna oraı, áleýmettik jaǵdaıdy odan ári kúsheıtýge, ekonomıkany damytýǵa jáne ulttyq rýhanı baılyqty saqtaýǵa erekshe kóńil bóletin bolamyz», - dedi N. Nyǵmatýlın jalpy otyrysy kezinde.
Parlament qaraýynda 50-den astam zań jobasy bar. Olardyń arasynda «Memlekettik satyp alýlar jáne kvazımemlekettik sektordyń satyp alýlary máseleleri týraly», «Tabıǵı monopolııalar týraly» mańyzdy zań jobalarymen qatar, densaýlyq saqtaý, kólik, memlekettik satyp alýlar, AО́K-ti retteý, sondaı-aq menshik quqyǵyn qorǵaýdy kúsheıtý týraly zańnamalyq túzetýler, arnaıy ekonomıkalyq jáne ındýstrıaldy aımaqtar, kınematografııaǵa qatysty qujattar qamtylǵan.
Esterińizge sala keteıik, 1 qyrkúıekte QR Parlamenti palatalarynyń birlesken otyrysynda Prezıdent turǵyn úı-kommýnaldyq sharýashylyq salasyndaǵy máselelerdi sheshýdi tapsyrdy. Sondaı-aq, Elbasy qoǵam densaýlyǵyn nyǵaıtýǵa qatysty zań jobasynyń mańyzy týraly aıtty.
