QR Memlekettik hatshysy, QR Prezıdenti janyndaǵy otbasy jáne áıelder isi jónindegi ulttyq komıssııasynyń tóraıymy Gúlshara Ábdiqalyqova Elbasynyń konferensııa qatysýshylaryna arnalǵan quttyqtaý hatyn oqyp berdi.
«Konferensııadaǵy kún tártibiniń ózektiligi áıelderdiń zamanaýı ómirdegi erekshe rólin jáne kóptegen saıası, áleýmettik máselelerdi sheshýge, shıelenisterdi retteýge, beıbitshiliktiń damýyna qosqan ólsheýsiz úlesin aıshyqtaı túsedi. Táýelsizdik alǵan sátten beri Qazaqstan genderlik saıasat máselelerinde joǵary álemdik standarttarǵa qol jetkizý úshin jáne eldiń áleýmettik-saıası ómirindegi áıelderdiń rólin kúsheıtý úshin júıeli jumys istep keledi. Qazaqstan genderlik teńdik jónindegi barlyq irgeli halyqaralyq qujattardy ratıfıkasııalady, onyń qaǵıdalary bizdiń strategııalyq jáne saıası qujattarymyzda damı tústi», - delingen Memleket basshysynyń quttyqtaý sózinde.
Prezıdent Qazaqstannyń BUU Qaýipsizdik Keńesiniń múshesi retinde tutas álemdik qaýymdastyqtyń belsendi qoldaýymen Ortalyq Azııa men Aýǵanstandaǵy qaýipsizdikti qamtamasyz etýge erekshe kóńil bólip otyrǵanyn jetkizdi. Bul proseste Aýǵanstandaǵy áıelderdiń quqyqtary men múmkindikterin keńeıtý mańyzdy.
«Aýǵan úkimetiniń eldegi áıelderdiń jaǵdaıyn jaqsartý jáne genderlik teńdikti qamtamasyz etýdegi qadamdaryn joǵary baǵalaı otyryp, Aýǵanstanda aýǵan halqyna arnalǵan tujyrymdama men halyqtyń óz kúsh-jigeri arqyly tezirek beıbitshilik ornaǵanyn qalaımyz. Mundaǵy basty aspekt azamattyq sektordyń, halyqaralyq, óńirlik jáne ulttyq ukimettik emes uıymdar áleýetin belsendi paıdalaný bolyp otyr» - deıdi Nursultan Nazarbaev.
Osyǵan baılanysty, Prezıdenttiń aıtýynsha, búgingi konferensııalar syndy halyqaralyq alańdar áleýeti tutas halyqaralyq qaýymdastyqtyń keń aýqymdy pikirin eskere otyryp, qazirgi jáne keleshektegi eń mańyzdy máselelerdi talqylaýǵa múmkindik beredi.
«Búgingi konferensııa Aýǵanstandy odan ári damytý jáne ońaltýǵa, aýǵan áıelderiniń jaǵdaıyn jaqsartýǵa jáne eldegi saıası, ekonomıkalyq, áleýmettik máselelerdi sheshý joldaryn izdestirýge qosymsha serpin beretinine senimdimin. Konferensııa qatysýshylarynyń joǵary sapaly quramy men ókilettiligi barlyq qatysýshylar úshin paıdaly pikir men tájirıbe almasýǵa múmkindik beredi», - deıdi Prezıdent.
Aıta keteıik, mundaı formattaǵy konferensııa Ortalyq Azııa óńirinde alǵash ret uıymdastyrylyp otyr. Buǵan deıin 2013-2018 jyldary Aýǵanstandaǵy áıelder máselesi boıynsha sımpozıýmdar serııasy Vashıngton, Oslo, Kabýl qalalarynda júrgizilgen bolatyn. Sharaǵa Aýǵanstan, Armenııa, Ázerbaıjan, Qyrǵyzstan, Tájikstan, Túrikmenstan, О́zbekstan, Eýropalyq Odaq, Qytaı, Reseı, Úndistan, AQSh memleketterinen jáne BUU-dan joǵary deńgeıdegi delegasııa ókilderi qatysýda.
