Esterińizge sala ketsek, «О́zen» kórkem fılmi festıvaldiń «Kókjıekter» (Gorızonty) atty konkýrstyq baǵdarlamasyna qatysýda. Aıta ketsek, bul baıqaýda barlyǵy 19 kınotýyndy baq synaıdy. Fılmdi 1000-ǵa jýyq kórermen tamashalady.
Kórsetilimnen keıin fılmniń rejısseri men akterler kórermendermen tildesti. Fılmdi túsirý ıdeıasynyń paıda bolýy týraly Emır Baıǵazın Súleımen patshanyń «adamnyń peıili tereń sý tárizdi» degen sózderin keltire otyryp, nıet bolsa, aldyńnan shyǵatyn qıyndyqtarǵa qaramastan, ómirdiń baqytyn sezinýge bolatynyn aıtty.
Fılmde basty rólderdi somdaǵan akterler de óz oılarymen bólisip, keıbir qıyndyqtar men aldaryna qoıylǵan qatań talaptarǵa qaramastan, túsirý alańy unaǵandary týraly jáne osy fılmge túskenderine qýanyshty ekenin jetkizdi. Jınalǵan kórermender akterlerdiń jaqsy tańdalǵany jáne olardyń sheberligi týraly sóz qozǵady.
Batystyń álemge áıgili basylymdary «О́zen» fılmi týraly jarysa jazyp, oń pikirlerin bildirip jatyr:
Hollywood Reporter:
Festıvalderde úlken tabysqa ıe bolǵan Emır Baıǵazınniń «Aslannyń sabaqtary» jáne «Tórt oqıǵa» fılmderinen keıin, jazýshy-rejısser túsirgen jańa fılm Aslan týraly trılogııanyń sońǵy bólimi. Bul kınotýyndy erekshe tártip pen aıqyndyqty sýretteı bilgen rejısserlik sheberliktiń shyńdalýynyń aıqyn dáleli. Keıbireýler bul fılm estetızasııaǵa toly dep aıtýy múmkin, alaıda bul týyndy sezimge toly, adamdy qyzyqtyryp, melanholıkalyq sezimge dýalaı alatyn jumys.
Screen International:
Baıǵazınniń jumystarynda árqashan kózge kórinetin bir nárse bar. Ol jeke bostandyq jáne jaýapkershilik, qyzyqtyrýshylyq jáne otbasy qatynastary týraly suraqtardy zerttegende, onyń erkin stıli oılaı alatyn sýbstansııamen tolyqtyrylady. Atalǵan taqyryptardyń kórinisi basqa da kınematografısterdiń jumystarynda baıqalady - Kler Denıden bastap, Mıklosh Iаnskonyń allegorııalyq shyǵarmalarynda, Joaý Pedro Rodrıgestiń ıkonaǵa syıynatyndarǵa qarsy oılarynda da keńinen qoldanylady.Tereń oıly, ári qıyn taqyrypta túsirilgen bul jumys adamnyń nazaryn ózine birden aýdara alady.
«О́zen» fılmi órkenıetten alys jerde turatyn, qaladan kelgen qonaqtan keıin ómirleri kúrt ózgere bastaǵan bes aǵaıyndy týraly baıandaıdy. Fılmniń túsirý jumystary Ońtústik Qazaqstan oblysynda júrgizildi.
