Forýmnyń qorytyndy otyrysy bıyl Vena jáne Venesııada bolǵan daıyndyq jınalystarynyń negizinde uıymdastyryldy jáne is-sharanyń sessııalary barysynda úkimet, jeke sektor, azamattyq qoǵam ókilderimen qatar halyqaralyq sarapshylar sıfrlyq ekonomıka dáýirindegi múmkindikter, bıznes sektorynda sıfrlyq qaýipsizdik, memlekettik jáne korporatıvti jaqsy basqarýda sıfrlyq ınnovasııalar, sıfrlyq dáýirde adam kapıtaly men ekonomıkalyq ózara baılanystyqty ilgeriletý máseleleri talqylandy. Osynyń negizinde bıyl Mılanda josparlanǵan EQYU Syrtqy ister mınıstrler keńesinde ekonomıka jáne qorshaǵan orta taqyrybyna arnalǵan sheshimder jobalaryn qabyldaý múmkindigi qarastyryldy.
Forýmnyń ashylý sessııasynda Memleket basshysynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» joldaýyndaǵy basymdyqtaryna Qazaqstan Respýblıkasynyń Vena qalasyndaǵy halyqaralyq uıymdar janyndaǵy Turaqty О́kili – EQYU Ekonomıka jáne ekologııa komıtetiniń tóraǵasy Qaırat Sarybaı nazar aýdardy.
Italııa Syrtqy ister jáne halyqaralyq yntymaqtastyq mınıstriniń orynbasary Djýlıelmo Pıkkı sıfrlandyrý EQYU úshin jańa taqyryp bolǵanyna qaramastan, uıym osy taqyryptyń tóńireginde ózin jandandyra alatynyn málimdedi. Sonymen birge, qazirgi tańda sıfrlandyrý bıznestiń damýyna ári jańa deńgeıge shyǵýyna oń yqpal etip jatqanyn jáne jańa jumys oryndarynyń ashylýyna sebepker bolǵanyn atap ótti. Sondaı-aq sıfrlandyrýdan týyndaıtyn qaýip-qaterlerge baılanysty uıymǵa múshe elderdiń keńese birlese jumys júrgizýdiń mańyzdylyǵy men qajettiligine toqtaldy.
Chehııa syrtqy ister mınıstriniń orynbasary Tomash Petrıchek EQYU Ekonomıka jáne ekologııa forýmynyń ózara senim jáne dıalog ornatý turǵysynan erekshe platforma bolǵanyn jetkizdi.
