Búgingi tańda Eýrazııalyq ekonomıkalyq odaq pen Táýelsiz memleketter dostastyǵy aıasynda, sonymen birge Qazaqstan-Belarýs úkimetaralyq saýda-ekonomıkalyq yntymaqtastyq jónindegi komıssııa sheńberinde áleýmettik-eńbek salasy boıynsha eki el arasynda yntymaqtastyq júzege asyrylyp keledi.
Qos eldiń vedomstvo basshylary Mádına Ábilqasymova men Irına Kostevıchtiń kezdesýinde taraptar ózin ózi jumyspen qamtyǵan halyqty formalızasııalaý, áleýmettik qyzmet kórsetý júıesin jańǵyrtý, áleýmettik-eńbek salasynda memlekettik qyzmetterdi ońtaılandyrý jáne avtomattandyrý, eki eldiń zeınetaqy júıesi jáne basqa da máseleler boıynsha qazaqstandyq tájirıbe tóńireginde birqatar ózekti máselelerdi talqylady.
Eki jaqty kezdesýde jalpy eńbek naryǵyn damytýdyń keleshegi jáne «Eýrazııalyq elektrondy eńbek bırjasy» sıfrly jobasyn qurý jónindegi Qazaqstannyń bastamasy da jan-jaqty sóz boldy. Bastamanyń negizgi basymdyǵy – sıfrlandyrý tártibiniń kózdegen maqsattaryna qol jetkizý. Bul – Eýrazııalyq ekonomıkalyq odaq sheńberinde sıfrly ekonomıkany damytý jolyndaǵy eńbek resýrstarynyń erkin aınalymy, birtutas eńbek naryǵyn qalyptastyrý jáne atalǵan odaqqa múshe elderdegi eńbekkerlerdiń jumyspen qamtylýyn jeńildetýdi kózdeıdi.
«Atalǵan bastamany iske asyrý Eýrazııalyq ekonomıkalyq odaq aıasynda bızneske, memlekettik organdarǵa jáne qyzmetkerlerge ýaqyt pen resýrstardy únemdeýge, qaǵazbastylyqty azaıtýǵa, ózara is-qımyl kedergilerin jeńildetýge, jumyspen qamtý prosedýralaryn ońtaılandyrýǵa, qos taraptyń aqparattyq múmkindigin arttyrýǵa keńinen jaǵdaı týǵyzady. Sonymen birge, kásipkerlerdiń osal toptary men kóleńkeli naryq kórsetkishteriniń tómendeýine sep bolady», dedi elimizdiń Eńbek jáne áleýmettik qorǵaý mınıstri M.Ábilqasymova.
Sonymen qatar ekijaqty kezdesýde mınıstrlikter arasynda áleýmettik jáne eńbek salasyndaǵy yntymaqtastyq týraly memorandýmǵa qol qoıyldy.
Taraptar áleýmettik eńbek jáne halyqty jumyspen qamtý salasynda birlesken jobalardy daıyndaý, osy baǵyttaǵy memlekettik saıasatty júzege asyrýda ózara aqparat, tájirıbe jáne bilim almasý, sondaı-aq ǵylymı-zertteý men ony damytý baǵytynda yntymaqtastyqty jandandyrý boıynsha ýaǵdalasty.
Sonymen qatar Belarýs delegasııasy Astana qalasynyń Esil aýdanynyń halyqqa qyzmet kórsetý, jumyspen qamtý, «Nurly júrek» áleýmettik qyzmet kórsetý ortalyǵy» MKM, «Qarttar men múgedek balalardy ońaltý ortalyǵy» sekildi birqatar áleýmettik nysandardy aralady.
«Eki kúndik baǵdarlama aıasynda áleýmettik qorǵaý men zeınetaqyny damytýdyń, sondaı-aq nátıjeli jumyspen qamtýdyń jáne halyq tabysyn kóterýdiń ózekti máseleleri boıynsha tájirıbe men pikir almastyq. Búgingi tańda problemalardy barynsha tıimdi sheshýge yqpal etetin áleýmettik eńbek salasyn sıfrlandyrý mańyzdy. Bul eń aldymen qos el Úkimetiniń negizgi basymdyǵy dep bilemin. Árıne, biz sizderdiń osy saladaǵy tájirıbelerińizdi baǵalaımyz. Atap aıtqanda, búginde Belarýs Respýblıkasynyń áleýmettik-ekonomıkalyq damýynyń kóptegen ındıkatorlarynda aldyńǵy qatarly tájirıbeler bar. Bizdiń taraptan oǵan qyzyǵýshylyq joǵary jáne ony ózimizde qoldana alamyz», dedi elimizdiń Eńbek jáne halyqty áleýmettik qorǵaý mınıstri M.Ábilqasymova.
«Biz «bir tereze» qaǵıdasymen jumys istep jatqan jumyspen qamtý ortalyqtaryna baryp oń ásermen oraldyq. Sonymen qatar eńbek naryǵyn retteý júıesinde Qazaq elinen úırenerimiz bar. Qazaqstandaǵy eńbekaqy tólemderiniń tásilderine erekshe kóńil aýdardyq. Bul baǵytta kósh ilgeri kele jatyrsyzdar. Meniń oıymsha, Belarýs Respýblıkasynyń aýmaǵynda josparlanǵan kelesi kezdesý biliktilik júıesiniń ulttyq taqyrybyna arnalady dep oılaımyn. Búginde biz osy baǵytta strategııalyq seriktestik ornattyq. Jýyq arada bul qos el Úkimeti deńgeıinde qabyldanatyn bolady», dep atap ótti Belarýs Respýblıkasynyń Eńbek jáne áleýmettik qorǵaý mınıstri I.Kostevıch.
Dýman ANASh,
«Egemen Qazaqstan»
