Bilim jáne ǵylym mınıstri E. Saǵadıev pedagogıkalyq quram men ata-analardyń aqparattyq júıeni qoldanýdaǵy biliktiligin arttyrý úshin mınıstrlik júıeli túrde jumys istep jatqanyn jetkizdi. Jyl saıyn muǵalimder aqparttyq-kommýnıkasııalyq tehnologııalardy qoldaný biliktiliktigin jetildirý kýrstaryna qatysady.
Atalmysh oqytý kezinde sıfrlyq tehnologııanyń damýy men ony qoldaný aıasynyń keńeıýine baılanysty oqý quraldarynyń mazmunyn jaqsartý máselesi de qarastyrylady. Mysaly, «Kúndelik», Jalpyulttyq bilim berý júıesi, BilimLand, Sapa menedjmenti júıesi syndy mobıldi qosymshalary men bilim berý resýrstaryn durys qoldaný kýrstarynda ustazdar bilimderin tolyqtyryp turady.
Sondaı-aq, biryńǵaı aqparattyq keńistik qalyptastyryp, tájirıbe almasyp, pedagogtar bir-birimen áleýmettik jeli men chattarda tájirıbesimen bólisý úshin qoǵamdyq jeliler de qurylyp jatyr.
«Oqý úrdisine avtomattandyrylǵan aqparattyq júıeniń kelýi ustazdarmen qatar, ata-analardy da oqytý qajettiligin týdyryp otyr. Mysaly, bıylǵy ótken respýblıkalyq ata-analar jınalysynda 1,6 mln ata-anaǵa bilim beretin aqparattyq júıelerdi qoldaný, ata-analar chatyn ashý, memlekettik qyzmetti avtomattandyrý, túrli mobıldi qosymshalarmen jumys isteý mehanızmi kórsetildi», — dedi bilim jáne ǵylym mınıstri.
Al densaýlyq saqtaý mınıstri E. Birtanovtyń aıtýynsha, «Sıfrlyq Qazaqstan» memlekettik baǵdarlamasyn iske asyrý aıasynda medısına qyzmetkerleriniń kompıýterlik saýattylyǵy men densaýlyq saqtaý salasyndaǵy aqparattyq júıelerdi ıgerýi úshin mamandar arnaıy oqytylady. Qazir 740 densaýlyq saqtaý uıymynda 182 myńnan astam adam jumys isteıdi.
«2018 jylǵy 8 aıdyń qorytyndysy boıynsha Mınıstrliktiń aqparattyq júıelerimen jumys isteýdi 44 869 dáriger men 118 035 orta medısına qyzmetkeri úırengen. Kompıýterlik saýattylyǵyn 46 282 dáriger jáne 125 729 orta medısına qyzmetkeri arttyrdy. Mınıstrlik jyl sońyna deıin barlyq 182 myń qyzmetkerin oqytyp, 100% kórsetkishke qol jetkizýdi josparlap otyr», — dedi E. Birtanov.
Sonymen qatar, emdelýshiler de densaýlyq saqtaý salasyndaǵy veb\mobıldi qosymshalardy qalaı qoldaný kerektigin úırenip jatyr.
Mınıstrdiń aıtýynsha, qazir 5 093 257 emdelýshi oqytylǵan, bul — tirkelgen halyq sanynyń 28,2 paıyzy. Bilimin arttyrǵan emdelýshilerdiń 933 myńnan astamy veb/mobıldi qosymshalardy qoldanyp júr.
Medısınalyq uıymdarda 471 sıfrlyq saýattylyq beketi qurylyp, onda mamandar mobıldi qosymshalardy ornatýdy jáne elektrondyq densaýlyq saqtaý qyzmetterin qalaı paıdalaný kerektigin kórneki túrde kórsetedi. Bul emhanalardaǵy uzyn-sonar kezekti azaıtyp, emdelýshilerge óte yńǵaıly bolary sózsiz.
Eńbek jáne halyqty áleýmettik qorǵaý mınıstri M. Ábilqasymova 2018 jylǵa 804 myń azamatty oqytý josparlanǵanyn jetkizdi. Búgingi kúni 623 665 adam, onyń ishinde sıfrlyq saýattylyq negizi men mınıstrliktiń aqparattyq júıesin 8143 áleýmettik-eńbek salasy mamany meńgergen.
«Halyqtyń sıfrlyq saýattylyǵyn arttyrýdyń mańyzdy arnalarynyń biri – azamattar men jumys berýshilerdi elektrondy eńbek bırjasyna tartý. Azamattardyń kóbi halyqty jumyspen qamtý ortalyqtary jáne elektrondyq eńbek bırjasy arqyly oqytyldy, olardyń sany – 535 695 adamdy quraıdy. Onyń ishinde 255 333 jumys izdeýshi jumys izdeýdiń elektrondyq formatyna kóshirilgen, 64 771 jumys berýshi bos jumys oryndaryn elektrondyq eńbek bırjasynda ornalastyrdy jáne 215 591 adam jumyspen qamtý ortalyqtary arqyly oqytyldy», — dep túsindirdi M. Ábilqasymova.
О́ńirler turǵysynan jyldyq jospardy tolyq oryndaǵan — Almaty men Qostanaı oblystary, sondaı-aq Aqtóbe oblysynyń da kórsetkishi joǵary (97%). Ortashadan tómen kórsetkishter Qaraǵandy oblysynda (61%), Jambyl oblysynda (61%) jáne Atyraý oblysynda (44%) baıqaldy.
Aýyl sharýashylyǵy mınıstriniń orynbasary A. Evnıevtiń aıtýynsha, fermerlerdi sıfrlyq saýattylyq daǵdylaryna úıretý tórt baǵyt boıynsha júrgizildi: elektrondyq memlekettik kórsetiletin qyzmettermen jumys isteý, tanaptardyń elektrondyq kartalaryn toltyrý, sıfrlyq tehnologııalarmen jumys isteý, kooperatıvterge aýyl sharýashylyǵy janýarlaryn birdeılendirý aqparattyq júıesin qoldanýǵa oqytý.
«Fermerlerge tyńaıtqyshtardy sýbsıdııalaýǵa ótinim berý kezinde kórsetiletin qyzmetterdi qalaı alý kerektigin úıretý jumystary júrgizildi. Osy baǵytta 40 000 fermerdi oqytý mindeti qoıyldy jáne búgingi tańda 29 623 fermer oqytylǵan. Bul kórsetkish tek bir memlekettik kórsetiletin qyzmetten turady, bul rette jyl sońyna deıin aýyl sharýashylyǵy sýbsıdııalaryn alý boıynsha barlyq memlekettik kórsetiletin qyzmetterdi avtomattandyrý kózdelip otyr», — dedi A. Evnıev.
Sonymen qatar, Aýyl sharýashylyǵy mınıstrliginiń aldynda tanaptardyń elektrondyq kartalaryn toltyrý boıynsha 15 000 sharýany oqytý mindeti turdy. Qazirgi kezde 66 230 sharýa oqytylǵan.
О́z kezeginde, aqparat jáne kommýnıkasııalar mınıstriniń orynbasary Nurgúl Maýberlınova bıyl elimizdiń barlyq aımaǵynda jergilikti atqarýshy organdar oqytý kýrstaryn ótkizgenin jetkizdi.
«Kýrstar bastalǵanda 500 myń adamdy oqytý josparlanǵan bolatyn. Maýsym aıynan bastap tamyz aıyna deıin 686 myńnan astam adam oqytyldy. Sonymen qatar, sıfrlyq saýattylyqty arttyrý «Qazposhta» jáne «Azamattarǵa arnalǵan úkimet» quraldary arqyly júrgizildi. Osylaısha «Qazposhtanyń» eki e-commerce ortalyqtarynyń bazasynda 765 myń adam elektrondy saýdany ıgerdi. Memlekettik korporasııanyń Connection Point bazasynda memlekettik qyzmetterdi «qashyqtan» alý boıynsha keńes berý jáne oqytý jumystary ótkizildi. Jalpy qamtylǵan halyq sany 7 mln adam», — dedi vıse-mınıstr.
Halyqty oqytý elektrondy saýda qyzmeti boıynsha taýarlar men qyzmetterdi onlaın satyp alý, satý jáne ilgeriletý, páter ıeleri kooperatıvteriniń onlaın-platformasyn qoldaný, onlaın-dúkenderdi ashý jáne taǵy basqa baǵyttar boıynsha júrgizildi. Oǵan qosa onlaın-bızneske arnalǵan quraldar men jeńildikter jaıly shaǵyn jáne orta bıznes ókilderine keńes berildi.
«Atameken» UKP tóraǵasynyń orynbasary E. Jumaǵazıevtiń aıtýynsha, aýyl sharýashylyǵyna sıfrlandyrý elementterin engizý, agrobiliktilikterdi arttyrý jumystary júrgizilip jatyr.
«Búginde UKP onlaın rejımde AtamekenServices portalynda servıstik qoldaý kórsetý boıynsha 2000-nan astam qyzmet kórsetti. Qaǵaz tasymaldaýshydan onlaın formatqa kóshý kezeńinde kásipkerlerge О́zine-ózi qyzmet kórsetý aımaqtary qarastyrylǵan, qazirgi tańda 189 Kásipkerlerge qoldaý kórsetý ortalyqtary men 25 Kásipkerlerge qyzmet kórsetý ortalyqtary janynan osyndaı aımaqtar qurylǵan. Sondaı-aq, О́zine-ózi qyzmet kórsetý aımaqtaryn basqarý ortalyqtary iske qosylǵan, onda ShOB qarjylyq emes qoldaýdyń barlyq túri boıynsha keńes beriledi», — dedi E. Jumaǵazıev.
Sondaı-aq, halyqtyń sıfrlyq saýattylyǵyn arttyrý boıynsha óńirlerde qabyldanyp jatqan sharalar týraly Aqtóbe oblysynyń ákimi B. Saparbaevtyń jáne Qaraǵandy oblysynyń ákimi E. Qoshanovtyń baıandamalary tyńdaldy.
Máseleni qaraý qorytyndysy boıynsha, QR Premer-Mınıstri Baqytjan Saǵyntaev Aqparat jáne kommýnıkasııalar mınıstrligine múddeli memlekettik organdarmen, óńirlerdiń ákimdikterimen birlesip halyqty sıfrlyq saýattylyqqa oqytýdy odan ári jalǵastyrýdy jáne «Sıfrlyq Qazaqstan» memlekettik baǵdarlamasynyń mindetterin eskere otyryp josparly ındıkatorlardy qaıta qaraýdy tapsyrdy.
Bilim jáne ǵylym mınıstrligine Aqparat jáne kommýnıkasııalar, Eńbek jáne halyqty áleýmettik qorǵaý mınıstrlikterimen jáne ózge múddeli memlekettik organdarmen birge salalardaǵy qajettilikti eskere otyryp, mamandardy oqytý jáne sıfrlyq saýattylyǵyn arttyrý baǵdarlamalaryn jańartý tapsyryldy.
Baqylaý jumystary Asqar Jumaǵalıevke júkteldi.
