О́ńirlik basylym redaktorlaryn «Egemen Qazaqstannyń» shyǵarmashylyq-óndiristik áleýetimen tanystyrý maqsatynda ótken kezdesýde qazaq basylymdarynyń aqparat taratýdaǵy kókeıkesti taqyryptary talqylandy.
Mundaı jıyndar memlekettik aqparattyq saıasatty júıeli júrgizip jatqan gazettiń múmkindigin odan ary arttyrary sózsiz. Atalǵan shara elimizdiń basqa aımaqtarynan kelgen jýrnalısterge de is-tájirıbe almasýǵa úlken múmkindik. Qyzylorda oblysynyń redaktorlaryn bastap kelgen «Syr medıa» basshysy búgingi ótken jıynda shyǵarmashylyq óndiriste kezdesetin kúrmeýli suraqtardyń jaýabyn tapqanyn aıtty.
«Elimizdegi aldyńǵy kóshti bastap kele jatqan gazetten qaı basylymnyń da úıreneri kóp. Búgingi semınarda sheshimin taba almaı júrgen suraqtarymyzdyń jaýabyn tapqandaı bolyp otyrmyz. Bas basylymnyń jumys isteý saıasatynyń ózgerip jatqanyna óte rıza boldyq. Ásirese ınternet júıesimen jańasha qadam bastap jatqany unady», dedi «Syr medıa» basshysy Amanjol Ońǵarbaev.
«Egemen Qazaqstan» gazeti oqyrmanǵa jaqyn bolý maqsatynda saıtta maqalalar men qosa arnaıy vıdeo jobalar jarııalaı bastady. Osy oraıda Youtube-tan arnaıy «Egemen TV» arnasy ashyldy. Onda «О́rnek», «Stadıon», «Sarapshy pikiri» sekildi túrli jobalar jaryq kórdi. «Syr medıa» jýrnalısterin dál osyndaı mýltımedııalyq baǵytta aqparat taratý isi qyzyqtyrdy.
«Egemen Qazaqstan» gazeti bas redaktorynyń orynbasary Qambar Ahmettiń aıtýynsha, dál osyndaı bastamamen ózge de óńir jýrnalısteri tájirıbe almasatyn bolady.
«Qyzylorda oblysynan kelgen áriptesterimizdiń yntaly bolǵanyn kórdik. Olardyń tarapynan jaqsy usynystar aıtyldy. «Egemen Qazaqstanda» materıaldar jarııalap, birlese jumys atqarsaq deıdi. Osyndaı tájirıbe almasý jóninde usynystar kóbeıýde. Aldaǵy ýaqytta bizge Shyǵys Qazaqstan oblysynyń delegasııasy kelmekshi. Biz osyndaı usynystar túsip jatqanyna qýanyshtymyz», dedi ol.
