О́tken jyly Qostanaı oblysynda 322 000 adam zeınetaqy qoryna jarnasyn tólemegen. Solardyń arasynan bıyl 285 000 adamnyń mártebesi anyqtaldy. Oblystyq jumyspen qamtýdy úılestirý jáne áleýmettik baǵdarlamalar basqarmasynyń mamandary úı-úı, aýlalardy aralap júrip, qalǵan 37 myń adamdy da anyqtady. Sonyń ishinde 11500 adam jeke malymen, óz aýlasyndaǵy sharýashylyǵymen kún kóredi.
«Osylar Birińǵaı jıyntyq tólem tóleýshiler bolyp tabylady. Al qalǵandary stýdentter, úı sharýasyndaǵy áıelder, Qazaqstannan ketip qalǵandar, jumyssyzdar bolyp shyqty», - dedi Oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Aıda Husaıynova. Oblystyq «Áleýmettik medısınalyq saqtandyrý qory» oblystyq fılıalynyń dırektory Sáýle Aımuhambetovanyń aıtýynsha, elimizde salyq pen zeınetaqy jáne medısınalyq saqtandyrý júıesine qatyspaıtyndar úshin Birińǵaı jıyntyq tólem engiziletin bolady.
«Ol 2019 jyldyń 1 qańtarynan bastap engiziledi. Ol tórt túrli salyqtan turady. 1aılyq esep kórsetkishi qalalyqtar úshin, 0,5 aılyq esep kórsetkishi aýyldaǵylar úshin belgilengen. Onyń 10 prosenti – jeke tabys salyǵyna, 20 prosenti – áleýmettik saqtandyrýǵa, 30 prosenti zeınetaqy qoryna, 40 prosenti – mindetti áleýmettik medısınalyq saqtandyrý qoryna tólenedi. Al bir aılyq esep kórsetkishi qazir 2405 teńge» dedi Sáýle Aımuhambetova.
Qysqasy, eger álgi 11500 adam Birińǵaı jıyntyq tólem tóleýden bas tartsa, olar aýyrǵan jaǵdaıda, «mindetti áleýmettik medısınalyq qory» esebinen tegin medısınalyq kómek ala almaıdy, barlyǵyn da ózderi qaltasynan tóleıtin bolady. Al tótenshe jaǵdaı buǵan kirmeıdi. Mamandar brıfıngte birińǵaı jıyntyq tólemnen bas tartqan adamdarǵa kómektiń basqa túri ázirge joq ekenin aıtty.
Názıra Járimbet,
«Egemen Qazqstan»
Qostanaı
