Aqqaıyń aýdanynda ornalasqan «Daıyndyq» jáne «Poltavka» agroqurylymdarynyń basshylary Birjan Shaımerdenov pen Eltaı Zikirın atamekenin túletip, mádenıeti men salt-dástúriniń jańǵyrýyna,turǵyndardyń ómir sapasyn jaqsartýǵa belsene atsalysyp keledi. Bul eki azamattyń «Rýhanı jańǵyrý» baǵdarlamasy aıasynda da atqarǵan eleýli isteri qyrýar. Solardyń biri– 28 mıllıon teńge qarajat bólip, babalary Jansúgir batyrǵa arnap bıiktigi 15 metrge jeteǵabyl záýlim kesene turǵyzýy. Sanaly ǵumyryn bala tárbıesine arnaǵan ardager ustaz Moldahmet Suraǵanov kóz maıyn taýysyp Qojabergen, Bógenbaı batyrlardyń jasaǵy quramynda qalmaqtarǵa qarsy joryqtarǵa qatysyp, myńbasy bolǵan, erjúrektiligimen, sheshendigimen kózge túsken Jansúgir Baýbekuly jaıly kóptegen derekter jınaǵan eken. Kózi tirisinde zıratyn túzep, kórnekti belgi ornatý oıynda bolǵanymen ol armanyna jete almaı ketken. Aýyl aqsaqalynyń amanatyn júzege asyrýǵa Birjan jáne Eltaı belsene kirisip, Aralaǵash aýylyna taqaý tusta Astana-Petropavl kúre jolynyń boıyna alystan men mundalap kórinetin appaq keseneni bas-aıaǵy tórt aıdyń ishinde turǵyzyp berdi. Mármár tastar da, qurysh qoldy sheberler de Aqtaýdan arnaıy aldyrtyldy.
Nysannyń ashylý saltanatynda aýdan ákimi Dáýren Baıtóleshov, oblystyń ókil ımamy Kenjetaı qajy Baıkemeluly, aýdannyń qurmetti azamaty Ábý Ábilmájinov, keleli sharany uıymdastyrýshylardyń biri Sansyzbaı Jumabekov, taǵy basqalary sóılegen sózderine «Bir adamnyń batyldyǵy myń adamǵa jol salǵan, Bir adamnyń batyrlyǵy tutas halyqtyń atyn shyǵarǵan» degen tarıhı maǵynasy tereń paıymdy alǵa tarta otyryp jaýgershilik zamanda el qorǵany bola bilgen, alys-jaqyn aǵaıynnyń tatýlyǵyn oılaǵan tulǵanyń jurtshylyq bile bermeıtin el basqarý,bılik aıtqan qasıetteri jaıly tebirene áńgimeledi. Qyzyl ımperııanyń solaqaı saıasaty kezininiń ózinde Seksen, Eskendir sekildi aqsaqaldar úlken obanyń basyna belgi ornatqan. Parlament Májilisiniń depýtaty Abaı Tasbolatov qurastyrǵan «Esimderi el esinde» jınaqta da Jansúgir batyrdyń esimi erekshe atalady.
Babamyzdyń rýhyna quran baǵyshtalyp, as berildi. Báıge, palýandar beldesýi uıymdastyryldy.
О́mir ESQALI,
«Egemen Qazaqstan»
Soltústik Qazaqstan oblysy
Aqqaıyń aýdany.
