Birlesken otyrys jumysyna memlekettik organdardyń, saıası partııalardyń, úkimettik emes uıymdardyń ókilderi men sarapshylar qatysty.
Otyrysty ashqan QR OSK basshysy Berik Imashev aǵymdaǵy jyly bolǵan saılaý zańnamasyna engizilgen ózgerister men tolyqtyrýlar Saıası partııalar men úkimettik emes sektordyń saılaý prosesterine neǵurlym belsendi qatysýy úshin aıtarlyqtaı áleýetke ıe ekenin atap ótti.
"Búgingi birlesken otyrys - bul memlekettik organdar, saıası partııalar men úkimettik emes uıymdar arasyndaǵy ózara is-qımyl, ózara túsinistik deńgeıin arttyrý boıynsha úlken jumystyń bastaýy", - dedi B. Imashev.
Otyrys barysynda saılaý prosesindegi azamattyq qoǵam ınstıtýttarymen ózara is-qımyl máseleleri boıynsha pikir almasyldy, jergilikti ókildi organdar depýtattarynyń saılaýyn ótkizý kezinde proporsıonaldy saılaý júıesine kóshýge, múgedekterdiń saılaý quqyqtaryn qamtamasyz etýge baılanysty saılaý zańnamasyndaǵy ózgerister men tolyqtyrýlar talqylandy.
B. Imashev sondaı-aq Saıası partııalar men úkimettik emes uıymdardyń saılaý prosesiniń negizgi qatysýshylary bola otyryp, saılaý zańnamasyna sáıkes, atap aıtqanda, saılaý komıssııalarynyń quramyn qalyptastyrýda, óz ókilderin saılaý laýazymdaryna usynýda, saılaýdy baıqaýda, saılaý prosesine qatysýshylardy elektoraldyq oqytýdy uıymdastyrýda quqyqtary men ókilettikteriniń keńeıtilgen sheńberine ıe ekendigine nazar aýdardy.
Qazaqstan Respýblıkasynyń Qoǵamdyq damý mınıstri Darhan Káletaev óz sózinde bolashaqta qoǵamdyq-saıası prosesterdi basqarýda pikir plıýralızminiń ósýin eskere otyryp, azamattyq qoǵam ınstıtýttary qatysýy tıis ekenin atap ótti. Derekterge sáıkes, halyqtyń arasynda ÚEU qoǵamdyq ómirge, azamattyq, sonyń ishinde saılaýdy baıqaýyna keńinen qatysýyna degen suranys áli de qanaǵattanbaǵan. Suralǵandardyń 35% - y ÚEU faktoryn sezinedi, al 65% - y olardyń rólin kúsheıtý qajettiligin kórsetedi. Demek, ÚEU-dy saılaý prosesin monıtorıngteý, taldaý jáne zertteý prosesine keńinen tartý qajet.
Otyrys barysynda QR OSK Tóraǵasynyń orynbasary K. Petrov «Qazaqstan Respýblıkasy Ortalyq saılaý komıssııasynyń saılaý salasyndaǵy saıası partııalarmen jáne úkimettik emes uıymdarmen ózara is-qımyl máseleleri týraly» taqyrypta baıandama jasady.
Birlesken otyrys qorytyndysy boıynsha birqatar naqty usynystar ázirlendi, QR Ortalyq saılaý komıssııasy men Qoǵamdyq damý mınıstrligi arasynda hattamaǵa qol qoıyldy.
Birlesken otyrys qarsańynda, aǵymdaǵy jyldyń 26 qyrkúıeginde, oblystardyń, Astana, Almaty jáne Shymkent qalalarynyń ishki saıasat basqarmalarynyń basshylary men qyzmetkerleri úshin "Azamattyq belsendilik: damýdyń jańa prosesteri" taqyrybynda oqytý semınar-trenıngi ótkizildi.
Saılaý úderisindegi qoǵamdyq birlestikter men saılaý komıssııalarynyń ózara is-qımylynyń ózekti máselelerin talqylaýǵa arnalǵan semınardy QR Ortalyq saılaý komıssııasynyń hatshysy Sábıla Saparqyzy Mustafına, QR QDR Azamattyq qoǵam isteri komıtetiniń tóraıymy Álııa Qaıratqyzy Ǵalymova, OSK elektorattyq oqytýdy uıymdastyrý bóliminiń jaýapty qyzmetkerleri ótkizdi.
Semınar-trenıng sheńberinde qatysýshylar Qazaqstan Respýblıkasynyń saılaý zańnamasyna sáıkes saılaý prosesine saıası partııalar men úkimettik emes uıymdardyń qatysýyn quqyqtyq retteý, saılaý máseleleri boıynsha keıbir zańnamalyq aktilerge engizilgen jańalyqtar aıasynda saılaýshylardyń saılaý-quqyqtyq mádenıetin arttyrýda jergilikti atqarýshy organdardyń úkimettik emes uıymdarmen ózara is-qımyl nysandary týraly júıelendirilgen bilim aldy.
Osyǵan baılanysty proporsıonaldy saılaý júıesi negizinde jergilikti ókildi organdardy (máslıhattardy) qalyptastyrýǵa, múmkindikteri shekteýli azamattardyń saılaý quqyqtaryn odan ári qamtamasyz etýge qatysty saılaý zańnamasynda jaqynda qabyldanǵan jańashyldyqtar, elektorattyq oqytýdy uıymdastyrý jónindegi quqyqtyq normalar talqylandy.
О́tken semınar Ortalyq saılaý komıssııasy, Qoǵamdyq damý mınıstrligi jáne úkimettik emes sektor arasyndaǵy tıimdi úshjaqty áriptestiktiń ózekti úlgisi boldy.
