Májilis Tóraǵasy Nurlan Nyǵmatýlın Eńbek resýrstaryn basqarýdyń tıimdi júıesin qalyptastyrý týraly sóz qozǵady.
Májilis Spıkeri atap ótkendeı, jumys - azamattardy áleýmettik qorǵaýdyń, ómir súrý sapasyn jaqsartýdyń jáne memleketimizdi odan ári damytýdyń basty kepili. Bul – qoǵamdyq turaqtylyqty saqtaýdyń da negizgi sharty.
Sondyqtan, Elbasymyz Nursultan Ábishuly Nazarbaev táýelsizdiktiń birinshi kúninen bastap, osy máselege erekshe kóńil bólip, barlyq jaǵdaıdy jasap kele jatyr.
Bul baǵytta 2011-shi jáne 2016-shy jyldarda elimizde «Jumyspen qamtý jol kartasy» júzege asyryldy. Nátıjesinde 5 jylda 800 myńnan astam adam jumysqa ornalasty.
Al, byltyrdan beri elimizde «Nátıjeli jumyspen qamtýdy jáne jappaı kásipkerlikti damytý» baǵdarlamasy bastaldy.
Osy saladaǵy mańyzdy suraqtyń biri retinde Májilis Tóraǵasy Tórtinshi ónerkásiptik revolıýsııa nátıjesinde jumys oryndarynyń bosatylýyn atap ótti. Máselen, avtomattandyrý jáne sıfrlandyrý kezinde álemde keıbir kásipterdiń 30 paıyzǵa jýyǵy qysqarýy múmkin degen boljam bar. Osy jolda N. Nyǵmatýlın eńbek resýrstaryn basqarý júıesin qalyptastyrý óte mańyzdy ekenine toqtaldy.
Barlyq jańashyldyqtardy zańnamalyq turǵydan qoldaý jolynda kóptegen sharalar atqaralyp kele jatqanyn aıta kelip, Palata Spıkeri:
- О́zderińiz bilesizder, búgingi kúni jumysqa degen suranys óte joǵary.
Sol úshin Elbasymyz Nursultan Ábishuly Nazarbaev óziniń árbir tapsyrmasynda jańa kásiporyndardy ashyp, jumys oryndaryn kóbeıtý týraly naqty mindetter qoıyp otyr.
Olardy, sapaly zańdarmen qamtamasyz etý, bizdiń Parlamenttiń negizgi maqsaty, - dedi.
