Jıyn qorytyndysy boıynsha 15 qujatqa qol qoıyldy. Olardyń ekeýi – halyqaralyq kelisim. Atap aıtqanda, uıymǵa múshe memleketter Aqparattyq tehnologııa salasyndaǵy qylmyspen kúres jónindegi yntymaqtastyq jáne ǵarysh keńistigin beıbit maqsatta paıdalaný jáne zertteý jónindegi yntymaqtastyq konvensııasy biraýyzdan qabyldandy.
TMD Atqarýshy komıtetiniń tóraǵasy Sergeı Lebedevtiń aıtýynsha, memleket basshylary TMD-ny damytýǵa qatysty ózekti máselelerdi talqylady. Sondaı-aq Túrikmenstannyń keler jylǵy tóraǵalyǵyn qoldady. Áıtse de, 2019 jyly TMD-ǵa eki memleket tóraǵalyq etedi. Onyń ekinshisi – О́zbekstan.
«Túrikmenstannyń usynysy boıynsha TMD Memleket basshylary keńesiniń kelesi otyrysyn 2019 jyly 11 qazanda Ashhabadta ótkizý týraly sheshim qabyldandy. Kadrlyq máselelerden bólek jıynǵa qatysqan memleketter qalǵan qujattardy talqylaýsyz qol qoıýǵa kelisti», dedi S.Lebedev.
Budan bólek, TMD Memleket basshylary keńesiniń sheshimderine qatysty 13 qujat rásimdeldi. Olardyń qatarynda Túrikmenstannyń kelesi jyldaǵy tóraǵalyǵy, Uly Jeńistiń 75 jyldyǵyna daıyndyq sharalary, 2021 jyly Tájikstanda «Dostastyqtyń mádenı astanalary» atty memleketaralyq baǵdarlamany iske asyrý, 2019-2023 jyldar aralyǵynda qylmyspen kúres sharalaryn birlesip júrgizýdiń memleketaralyq baǵdarlamasy, TMD-ǵa múshe memleketterdiń Terrorızmge qarsy ortalyǵy týraly erejeni tolyqtyrý, keńestiń keıbir sheshimderin toqtatý, TMD-ǵa múshe Memleket basshylarynyń Dúnıejúzilik kóshpendiler oıyndary týraly málimdemesi, jazýshy Shyńǵys Aıtmatovtyń 90 jyldyǵyna arnalǵan birlesken málimdeme jáne taǵy basqa qujattar bar.
TMD-ǵa múshe memleketter basshylarynyń kezekti otyrysyna Elbasy Nursultan Nazarbaev qatysty. Sonymen qatar jıynǵa Reseı Prezıdenti Vladımır Pýtın, Belarýs prezıdenti Aleksandr Lýkashenko, Ázerbaıjan Prezıdenti Ilham Alıev, Qyrǵyzstan Prezıdenti Sooronbaı Jeenbekov, Armenııa Premer-mınıstri Nıkol Pashınıan, Moldova Prezıdenti Igor Dodon jáne О́zbekstan Prezıdenti Shavkat Mırzııoev, Túrikmenstan mınıstrler kabıneti tóraǵasynyń orynbasary Pýrlı Agamýradov keldi.
Otyrystyń alǵashqy bóligi shaǵyn quramda, jabyq esik jaǵdaıynda ótti. Onda TMD tóraǵalyǵy jáne uıymǵa múshe memleketter basshylarynyń kezekti otyrysyn ótkizý máseleleri qaraldy.
Keńes barysynda TMD-ǵa tóraǵalyq etý mindeti Túrkimenstan tarapyna resmı túrde tapsyryldy.
Abaı ASANKELDIULY,
"Egemen Qazaqstan"
Dýshanbeden
