Foto: Mereı QAINAROV
28 qyrkúıekte, jazýshynyń dál týǵan kúninde aýdan ortalyǵy – Glýbokoe kentinde tulǵanyń 75 jyldyǵyna oraı tańnan keshke deıin ártúrli mádenı-tanymdyq sharalar uıymdastyryldy. Áýeli balalar shyǵarmashylyq úıinde Oralhan Bókeıdiń «Jylymyq» povesiniń jelisi boıynsha teatrlandyrylǵan kórinis qoıyldy. Spektakldi ázirlegen Oralhan Bókeı mektebiniń ónerli qyz-jigitterine kórermender alǵystaryn jaýdyryp, rızashylyqtaryn bildirip jatty. «Kórinis munshama áserli bolar ma edi?! Ǵajap. Ásirese Oralhannyń rólin oınaǵan ónerli jigit qatty tebirentip, ótken kúnderdi kóz aldyma ákelgendeı, Orash tirilip kelgendeı áser syılady», – deıdi qalamgerdiń «ishek-qarny aralasqan» aýyldas, synyptas dosy Amanjan Nuqsarın.
Tústen keıin Aqtas jurtshylyǵy Janat Rasylhan, Qýanysh Erkinuly, Ardabek Aqbaba, Nurjan Jolbarys, Manarbek Satybaldy, Juldyzaı Maratbekqyzy syndy óńir aıtyskerleriniń ónerin tamashalady. Senesizder me, senbeısizder me, ózge ult ókilderi kóp qonystanǵan bul aýdanda buǵan deıin birde-bir ret aıtys uıymdastyrylmaǵan eken. Sodan da bolar, aýdan ortalyǵynda, aýyldarda turatyn at tóbelindeı qarakózderimiz sóz dodasyn eki saǵat boıy tapjylmaı tamashalady. «1997 jyly Glýbokoe aýdanynda eń alǵash qazaq mektebi ashylǵanda Oralhan Bókeıdiń esimi berilgen edi. Sodan beri jazýshynyń týǵan kúni ataýsyz qalyp kórgen joq. Oralhan Bókeı – qasıetti Altaıda, áıgili Shyńǵystaı aýylynda dúnıege kelgenimen, Shyǵys Qazaqstannyń ǵana emes, kúlli alash jurtynyń maqtanyshyna aınalǵan ańyz adam. Sondyqtan qalamgerdiń 75 jyldyq mereıtoıyna oraı tulǵanyń esimin ulyqtap, shyǵarmalaryn el jadynda jańǵyrtýdy jón kórdik», - dedi oblystyq aıtystyń ashylýynda sóz alǵan aýdan ákimi Qalıhan Baıǵonysov.
Sonymen, Glýbokoe aýdanynda tuńǵysh ret ótkizilgen aıtysta Oralhan Bókeıdiń týyndylaryn, ondaǵy keıipkerlerdi jatqa soǵyp, odan bólek aýdannyń osal tusy onomastıka salasyn jyrǵa qosqan zaısandyq aqyn Ardabek Aqbaba birinshi oryndy enshilese, ekinshi oryndy aqtastyqtardyń atynan shyqqan Qýanysh Erkinuly, úshinshi oryndy óskemendik Juldyzaı Maratbekqyzy ıelendi. Bul kúni mereıtoıǵa alys-jaqynnan kelgen meımandar - baspager Qaıyrdy Nazyrbaev, aqyn Álibek Qańtarbaev, Baqytjan Raıysova, jazýshy Toqtarbek Maǵzumov Oralhan Bókeı jaıynda estelikterin aıtyp, qalamgerdiń 75 jyldyǵyn ataýsyz qaldyrmaǵan aqtastyqtarǵa alǵystaryn jetkizdi. Sonymen qatar jazýshynyń rýhyna baǵyshtalyp as berilip, voleıboldan, qol kúresten, toǵyzqumalaqtan jarys ótkizildi.
Azamat QASYM,
«Egemen Qazaqstan»
Shyǵys Qazaqstan oblysy,
Glýbokoe aýdany
