Sapar barysynda qazaqstandyq parlamentshiler «Klımattyń ózgerýi jáne qorshaǵan orta: qaýipsizdikke áser etý» taqyrybyndaǵy 3-shi pikirsaıysqa qatysty. Shara taqyryby klımattyq ózgerister men Azııa jáne Eýropadaǵy beleń alǵan ekologııalyq máselelerge arnaldy. Atap aıtqanda, turaqty damý jáne qaldyqsyz ekonomıka, qalalyq aýdandardy basqarý, sý resýrstary salasyndaǵy yntymaqtastyq, qaldyqtar men taza tehnologııalar jáne azyq-túlik qaýipsizdigi máseleleri talqylandy.
Senator Muhtar Qul-Muhammed óz baıandamasynda Qazaqstan men halyqaralyq qaýymdastyqtar tarapynan Aral teńizi máselelerin sheshýde qabyldanyp jatqan sharalar týraly áńgimeledi. Depýtat jergilikti jáne jahandyq ekojúıede álemdegi iri sý qoımalarynyń biri – Aral teńiziniń tartylýynyń saldary týraly habarlady. M.Qul-Muhammed Úlken Aral máselesi áli de tolyq sheshimin tappaǵan kúıinde qalyp otyr, degen pikir bildirdi. «Sońǵy jyldary aımaqtaǵy keıbir memleketter kórshi eldermen kelisimge kelmesten, sý aǵatyn tabıǵı arnalardy bógeı otyryp, qosymsha sý elektr stansııalarynyń qurylysy boıynsha jobalardy qolǵa alýda. Aımaqta sapaly aýyz sý tapshy. Aımaqtaǵy mıllıondaǵan adamdardyń densaýlyǵy men áleýmettik ahýal sýdy durys paıdalanýǵa tikeleı baılanysty bolyp otyr», - dep atap ótti senator.
Baıandama barysynda Aral basseıniniń ekojúıesin qutqarý boıynsha halyqaralyq kúsh-jigerdi kúsheıtýge baǵyttalǵan birqatar usynystar aıtyldy. «Biz – parlamentshiler «Azııa-Eýropa» forýmyndaǵy parlamentaralyq yntymaqtastyq jáne yqpaldastyq aıasynda Ortalyq Azııadaǵy sý resýrstaryn basqarý jóninde týyndaýy múmkin janjaldardy eskere otyryp, «sý dıplomatııasyn» ilgeriletýimiz qajet. Aımaqtyq jáne transshekaralyq yntymaqtastyq boıynsha jańa, aýqymdy ári ońtaıly baǵdarlamalar kerek», - dep esepteıdi M.Qul-Muhammed. Sondaı-aq, senator sý resýrstaryn basqarý máseleleri boıynsha ulttyq zańnamalardy jetildirý, klımattyń ózgerýi men qorshaǵan ortany saýyqtyrý boıynsha birlesken kúreste halyqaralyq uıymdardyń qyzmetine qarqyn qosý qajettigin atap ótti.
