«Nurly jol» baǵdarlamasyn iske asyrý qorytyndylary QR Investısııalar jáne damý mınıstrligi bergen málimetterge sáıkes ázirlengen ınfografıkalarda usynylǵan.
Memleket basshysy 2017 jylǵy qańtardaǵy «Qazaqstannyń úshinshi jańǵyrýy: jahandyq básekege qabilettilik» joldaýynda «Nurly jol» baǵdarlamasy eki jyl ishinde ózin tolyq aqtaǵanyn atap ótip, ony ekonomıkanyń tolyqqandy draıveri retinde odan ári damytý mindetin qoıǵan bolatyn.
«Bıyl respýblıkalyq mańyzy bar 4,6 myń shaqyrym avtojol qurylysy men qaıta jańǵyrtý jumystary boıynsha 23 jobany iske asyrý kózdelgen. Jyl sońyna deıin onyń 528 shaqyrymy paıdalanýǵa beriledi. Elimizdiń kólik jáne tranzıt áleýetin tolyq ashý úshin kórshi eldermen úılesimdi is-qımyl qajet. Júkterdiń erkin tranzıtin, kólik dálizderin qurý men olardy jańǵyrtý isin qamtamasyz etý kerek. Kólik ınfraqurylymyn basqarýǵa, qyzmet kórsetý deńgeıin arttyrýǵa jáne ákimshilik kedergilerdi joıýǵa erekshe kóńil aýdarý qajet. Transkaspıı dálizi boıynsha tasymaldaý kóleminiń ulǵaıýyna baılanysty Quryq portyn salýdyń ekinshi kezeńi – avtomobıl ótkeli qurylysyn iske asyrýǵa kirisý qajet», — delingen Joldaýda.
2018 jyly baǵdarlama aıasynda avtojoldardy salý kezinde kóptegen jumys oryndary ashyldy. Máselen, eger 2017 jyly qurylǵan 100 myń jumys ornynyń 70% avtojoldar qurylysyna baǵyttalǵan bolsa, 2018 jyly respýblıkalyq joldardy salý salasynyń ózinde 75 myńǵa jýyq jumys orny quryldy.
«Nurly jol» aıasynda 2020 jylǵa deıin 6,5 myń shaqyrym aqyly joldy paıdalanýǵa berý josparlanǵan. Onyń ishinde osy jyly — 471 shaqyrym. Bul — «Astana – Temirtaý», «Almaty – Qapshaǵaı», «Almaty – Qorǵas».
Jalpy 2020 jylǵa qaraı 7 myń shaqyrymǵa jýyq joldy rekonstrýksııalap, salý kózdelgen. Sonymen qatar, tranzıttik konteınerlik tasymaldar sany 10 esege — 2 mln konteınerge deıin ulǵaıtylady. Tranzıttik avıa jolaýshylar aǵynyn 4 esege — 1,6 mln-ǵa deıin ósirý josparda bar.
