Pedagogıka ýnıversıtetinde ótken keshte fılologııa ǵylymdarynyń kandıdaty, aqyn Serikbaı Ospanuly ózi maqalasynda aıtqandaı «Qaınekeıdiń qyrlaryna» toqtaldy.
«Rasynda, ensıklopedııalyq bilimi bar adam edi. Ádebı shyǵarmashylyǵyna kelsek, ol qazaq ádebıetinde ballada janryn qalyptastyrǵan kisi. Beıimbet Maılınniń tuńǵysh zertteýshisi de Qaınekeı bolatyn. Men álem aqyndarynyń aforızmderin zerttep júrmin. Qaınekeı óleńderinde aforızm tunyp turady» dedi Serikbaı Ospanuly.
Kitaphanadaǵy keshte fılologııa ǵylymdarynyń kandıdaty Naǵashybaı Muqatov ózi zerttegen Qaınekeıdiń ádebıettegi eńbekteri týraly keńinen áńgimelep berdi. Stýdentter Qaınekeıdiń balladalarynan úzindiler oqydy. Eki kezdesýge de Qaınekeıdiń týystary, qyzy Álıma Qaınekeıqyzy qatysty, estelikter aıtty.
«Ákemniń 100 jyldyǵy onyń týǵan jerinde atalyp ótip jatyr. Qazaq ádebıetindegi izi joǵalmaı, baǵasyn, jaqsy sózin estip jatyrmyz. Men ákemniń týǵan jeri, kindik qany tamǵan jerine birinshi ret aıaq basyp otyrmyn. Torǵaı óńirine baryp, ákemniń tabanynyń izi qalǵan, balalyq, jastyq shaǵy ótken topyraqqa táý etemin. Ákemniń súıegi de atalarymnyń qasynda, týǵan jerde jatyr. Olardyń basyna baryp, árýaǵyna quran oqytyp, taǵzym etemin» dedi Álıma Qaınekeıqyzy.
Keshterde Qaınekeı shyǵarmashylyǵy týraly jáne onyń kózin kórgender estelikter aıtty.
Názıra JÁRIMBET,
«Egemen Qazaqstan»
Qostanaı
