Sybaılas jemqorlyqqa baılanysty qylmystardyń basym bóligi Saryaǵash, Saıram jáne burynǵy Maqtaaral aýdanyna tıesili. Aýdan ákimi apparaty qyzmetkerlerine qatysty 7 oqıǵa tirkelse, ákimderdiń ústinen sybaılas jemqorlyqqa baılanysty 6 derek anyqtalǵan.
Bul derekterdi Túrkistan oblysy ákimi apparaty memlekettik quqyq bóliminiń basshysy N.Eshenqulov sybaılas jemqorlyqtyń aldyn alý jáne boldyrmaý joldary talqylanǵan májiliste málimdedi. Jemqorlyq derekteri ásirese, bilim salasynda jıi kezdesedi. Mysaly, jyl basynan bergi 8 aıda bilim salasy boıynsha 11 fakti tirkelgen. Onyń ishinde 5 mektep dırektory jáne bir balabaqsha meńgerýshisi paramen ustalǵan. Bul oraıda oblystyq bilim basqarmasy basshysynyń orynbasary A.Sadyqova korrýpsııanyń aldyn alý úshin basqarma tarapynan birqatar qyzmetterdi sıfrlandyrý sharalary qolǵa alynǵanyn aıtyp ótti. Máselen, balabaqshalarǵa joldama berý jáne kezekke qoıý avtomattandyrylyp, 12 myńnan astam bala balabaqshaǵa ornalasqan. Iаǵnı, adamı faktor azaıyp, ótinishter elektrondy túrde rettelgen. 902 orta mektep mektep.sitcen.kz júıesine qosylyp, oqýshylar osy arqyly mektepke qabyldanyp jatyr. Sonymen qatar, 902 bilim uıasynda jumys.sitsen.kz júıesi engizilip, 2718 ótinish kelip túsken. Júıe qyzmeti arqyly 321 muǵalim jumysqa qabyldanypty. A.Sadyqovanyń aıtýynsha, qazirgi tańda júıede 652 bos jumys orny týraly málimet tur. Jańa júıe dırektorǵa nemese basqalarǵa jolyqpaı jumysqa ornalasýǵa múmkindik beredi. Al, tehnıkalyq qyzmetkerlerdi jumysqa qabyldaýdy mektep dırektorynyń quziretinen alyp tastap, aýtsorsıngke ótkizý usynysy qarastyrylyp jatyr eken.
Májiliste oblys ákimi Janseıit Túımebaev paraqorlyqqa, zańsyzdyqqa jol bergen laýazymdy tulǵalarǵa qatań shara qoldanylatynyn aıtyp, qyzmetkerlerine eskertý jasady. Halyq arasynda sybaılas jemqorlyqqa qarsy mádenıetti qalyptastyrý jumystaryn qolǵa alý, bilim berý uıymdarynda mádenı-aǵartýshylyq jumystaryn atqarý tapsyryldy. Sondaı-aq sybaılas jemqorlyqqa qarsy komıssııa janynan ishki taldaý jumystaryn júrgizý úshin jumysshy toby qurylyp, aýdan, qala ákimderi men basqarma basshylary jemqorlyqqa qarsy kúresti kúsheıtýi tıis.
Ǵalymjan ELShIBAI,
«Egemen Qazaqstan»
Túrkistan oblysy
