AQSh-tyń Tehas shtatyndaǵy Rıchmond dep atalatyn shaǵyn ǵana qalada turyp jatqan Charlolar otbasy 1990 jyldyń jaımashýaq kókteminde qýanyshqa keneledi. Atap aıtsaq, 19 mamyr kúni shekesi torsyqtaı qos náreste dúnıege keldi. Ata-anasy biriniń atyn – Djermall, ekinshisin – Djermell dep atady. Bala kezderinen bokspen shuǵyldanǵana bastaǵan egiz uldar ýaqyt oza óz qatarlastarynyń aldy bolyp, úlken arenada aýyz toltyryp aıtarlyqtaı tabysqa qol jetkizedi.
Gennadıı Golovkınge qarsylas atanyp otyrǵan Djermall Charlonyń 2008 jyly Beıjińde alaýy tutanǵan Olımpııa oıyndaryna qatysýǵa múmkindigi boldy. Alaıda dál sol jarystyń qarsańynda qolynan qatty jaraqat alǵan ol ǵalamdyq dodadan shet qaldy. Sodan Charlo kásipqoılar arasynda kúsh synasýǵa bel býdy. Bul rette qadamy sátti boldy. 10 jyl aralyǵynda 27 kezdesý ótkizgen Djermall sol jekpe-jektiń barlyǵyn jeńispen aıaqtady. 21 qarsylasyn aıqyn basymdyqpen utty. Sońǵy jyldary aıtýly boksshyǵa ese jibergender qatarynda Maıkl Fınnı, Kornelıýs Bandreıdj, Ostın Traýt, Djýlıan Ýılıams, Horhe Heıland, Ýgo Senteno syndy sańlaqtar bar. Búgingi tańda Djermall Charlo WBC nusqasy boıynsha orta salmaqta ýaqytsha álem chempıony ataǵyn ıelenip otyr.
Egizdiń syńaryna keletin bolsaq, ol 2015 jyly Dúnıejúzilik jasóspirimder Olımpıadasynda qola medaldi ıelendi. Eresekter rınginde de táýir judyryqtasty. 2007 jyldan beri Djermell kásipqoılarmen aıqasyp júr. Sol kezden beri 31 ret sharshy alańǵa shyǵyp, barlyq básekede jeńiske jetti. 15 qarsylasyn nokaýtpen utty. Qazirgi kezde ol WBC nusqasyndaǵy birinshi orta salmaqtaǵy álem chempıony.
Búkilálemdik boks keńesi Gennadıı Golovkın men Djermall Charlony bir-birimen judyryqtasýǵa mindettegenimen, san mıllıon jankúıerdi bul básekeden góri qazaqstandyq óren men meksıkalyq Saýl Alvares arasyndaǵy aıqas kóbirek qyzyqtyrýda. Qazirgi kezde tórtkúl dúnıe jurtshylyǵy dál sol jekpe-jekti taǵatsyzdana kútýde. Kúni keshe BAQ ókilderine suhbat bergen Djermall Charlo osyǵan baılanysty óz oıyn bildirdi. «Eger qos tarap ortaq mámilege kelip, GGG men «Kanelo» arasyndaǵy úshinshi kezdesýin uıymdastyrylatyn bolsa, meniń oǵan esh qarsylyǵym joq», – dep málimdedi.
Ǵalym SÚLEIMEN,
«Egemen Qazaqstan»
