Aıtylǵan máselelerdiń bári asa mańyzdy. Sonyń ishinde shaǵyn jáne orta kásipkerlikti damytý, ásirese, aýyl kásipkerligin damytý máseleleri kóńilge qýanysh uıalatady. Sebebi, halqymyzdyń 40 paıyzynan astamy aýyldyq jerde turady desek, sonyń ishinde el ekonomıkasynyń úlken bir salasy – balyq sharýashylyǵy. Qazirgi kezde balyq ónimderin óńdeý sharýashylyqtaryn damytý kerek. Sebebi, balyq ónimderi eksportqa shyǵarylady, oǵan shet elderde sunranys joǵary.
Prezıdenttiń búgingi Joldaýynda aıtylǵan bastamalardyń qarjymen negizdelýi aýyldyq jerdegi shaǵyn kásiporyndardy, onyń ishinde aýyl sharýashylyǵy ónimderin óńdeýge úlken serpin beredi degen oıdamyn.
Taǵy bir úlken másele – ishki týrızmdi damytý. Elimizde onyń múmkindikteri zor bolǵanymen, biz onyń áleýetin, ókinishke oraı, áli tolyq paıdalana almaı otyrmyz. Sheteldikter elimizdiń ár aımaǵyndaǵy sulý tabıǵatta demalǵysy keledi. Mysaly, tek Atyraý oblysyndaǵy Qurmanǵazy aýdanynyń shekarasyndaǵy Edil ózeniniń Kaspııge quıar saǵasyna Eýropadan, Germanııadan, Fransııadan, Gollandııadan ańshylar keledi. Búkil Reseıdiń balyqshylary keledi. Nege osyny odan ári damytpasqa? Bul qosymsha jumys orny, memleketke qosymsha kiris bolar edi.
Taǵy bir úlken másele – bul áleýmettik sala. Joldaýda Elbasy memlekettiń, úkimettiń jumysy negizgi úsh baǵytta júrýi kerek, áleýmettik sala, ınfraqurylym, qaýipsizdik máselesi dedi. Sondyqtan, kelesi jyldan bastap, tómengi eńbekaqy mólsheriniń 20 paıyzǵa ósýi halyqtyń kútip júrgen máselesi. 1,5 mıllıonǵa jýyq adamnyń eńbekaqysy kelesi jyldan bastap ósse, onyń úsh júz myńǵa jýyǵy memlekettik qyzmetshiler. Ásirese, kásibı ótili az, jańadan qyzmetin bastaǵan mamandar úshin bul óte úlken qoldaý bolady dep oılaımyn.
Sársenbaı EŃSEGENOV,
Parlament Senatynyń depýtaty
