«Aýyl – el besigi» deıtin jobany usynǵan Elbasy aýylsyz keleshek joq, ómir joq ekenin sanamyzǵa quıyp berdi. Qazaqtyń nebir ǵalymdary, zııaly qaýym ókilderi aýyl deıtin altyn besikten túlep ushty. О́zi de aýylda ósip, jetilgenin aıtqan Elbasy barshamyzdy súısintti. Bul sózime Joldaýdy tamashalaǵan jurt kýá. Men de týyp-ósken aýylymnyń bolashaǵyna tıtteı de bolsa úles qosýdy armandaımyn. Men sekildi jastardyń kópshiligi sol oıda dep bilemin. Keı sátteri «qaladan jumys taba almaǵan soń, turatyn jeri bolmaǵan soń aýylǵa kelip jumys jasaýǵa májbúr» degen qasań pikirdi qulaǵymyz shalyp qalady. Shyn mánisinde olaı emes. О́z isiniń jiligin shaǵyp, maıyn ishken kez kelgen mamanǵa, jas bolsyn, jasamys bolsyn, qalaly jerdiń kez kelgen mekemesinen oryn tabylady.
Aýyldy qadirleý, aýyldy kórkeıtý, aýylǵa taǵzym etý – bolashaqqa alańdaý, keleshekke qamqorlyq jasaý. Qazaq eliniń negizgi baılyǵy – ata-babamyzdan qalǵan mal sharýashylyǵy. Tórt túligi saı bolǵan jannyń – kóńili jaı. Al myńǵyrtyp mal ustaý tek aýyldy jerde yńǵaıly. Jasyl jaılaý, shúıgin shóp, móldir sý. Baý-baqsha, kókónis ósirý, egin orý sekildi aýyl sharýashylyǵynyń mańyzdy jumystary da aýylda júzege asyrylmaq. Sonymen birge sporttyń saıypqyran sańlaqtary da aýyldyń shańynda shynyqqandar. «El ishi – óner kenishi» deıtin qazaq naqyly bekerge aıtylmasa kerek. Bizdiń Baıanaýyl aýdanynyń qaı aýylyna barsańyz, qos ishekten taraǵan qońyr kúı, áýezdi án, móldir jyr júregińizdi jaýlap alady. Mine, Elbasynyń aýyldy el besigine teńep otyrǵany beker emes.
Aýyldyń bolashaǵy úshin jasalar jumystardyń berekeli bolatynyna senimdimin.
Elaman QABDILÁShIM,
jas aqyn
