Sýretshiniń saıajaıynda sońǵy kezderi salǵan birneshe kartınalary tur eken. Solardyń biri kózime ottaı basyldy. Iá, ıá… Bul óte tanys kórinis qoı. Ońtústikke qaraı sapar shegip bara jatqanda talaı ret tamashalaǵanmyn.
Bir bastalsa, bir aı boıy tolastamaıtyn Qordaıdyń jeli soqsa shyrkóbelek aınalatyn alyp elektr generatorlary – bizdiń elimizge HHI ǵasyrda kelgen iri jańalyqtardyń biri. Olar qazir biraz óńirlerge elektr qýatyn beredi. Uzaqtan qarasań, kádimgi álem ádebıetinen jaqsy tanys ápendi keıipker Don Kıhot myrza shaıqasatyn sol baıaǵy jel dıirmenderge uqsaıdy.
Biraq olarǵa áli kúnge deıin qazaqsha bir at taýyp qoıa almaı kele jatqanymyz anyq. Osyǵan baılanysty meniń esime bir qyzyq oqıǵa oralady.
...1998 jyldyń kókteminde Shymkent qalasyna qyrǵyz ádebıetiniń klassıgi, esimi álemge áıgili jazýshy Shyńǵys Aıtmatov keldi. Ol kezde ońtústikte elektr qýaty óte tapshy edi. Jaryq bir sónip, bir janyp turatyn. Sondyqtan da qol shamnyń jaryǵymen ótken áńgime ústinde uly jazýshy Eýropada jel qýaty arqyly elektr energııasyn taratatyn generatorlardyń kóp ekendigin aıta otyryp: «Qudaı qalasa, ondaı apparattar bizdiń jaqqa da jetip qalar. Sondyqtan olardy qazaqsha qalaı ataý kerek ekenin sizder, qalamger baýyrlar, osy bastan oılastyra bergenderińiz abzal», degen-di jymıyp.
Bul sózdi, biz árıne, jadymyzda saqtap qaldyq. Keıin, rasynda da, Qordaı asýyna álgindeı alyp generatorlardyń bir emes, birnesheýi ornatylǵan kezde olardy qalaı ataıtynymyzdy bilmeı ishteı qysylǵanymyz da ras.
Al ótken jyly… jo-joq, aldyńǵy jyly eken-aý, Atyraýǵa issaparmen bara qalǵanymyzda sol generatorlardy ornatýǵa qatysqan bir top bilikti mamandarmen jolyǵyp, áńgimelesýdiń sáti túse ketkeni. Sonda olar: «Áı, baýyrlarym-aı, sender bizdiń qańǵalaqtarǵa qazaqsha at taba almaı qınalyp júr ekensińder-aý!» dep ázildep edi.
Sol sátte, shynymdy aıtsam, jel ekpinin elektr qýatyna aınaldyratyn alyp generatorlardy tap osylaısha qyzyq ta qarapaıym tilmen «Qańǵalaq» dep ataı salý kóńilge qona ketkendeı, qýanǵanymnan kúlip jibergenmin.
Endi mine, Qordaıdaǵy qańǵalaqtardy sýretshiniń kartınasynan kórip, qyzyqtap turmyn.
Rasynda da, olardy osylaı Qańǵalaq dep atasaq qalaı bolar eken, á?!.
Nurǵalı ORAZ,
«Egemen Qazaqstan»
