«Syrtqy ister mınıstrliginiń aldynda pragmatızm negizinde halyqaralyq arenada Qazaqstannyń syrtqy saıasatyn beıimdeý jáne ulttyq múddelerin ilgeriletý boıynsha naqty mindetter qoıyldy. Álemdegi ahýal aýysyp keledi, sondyqtan bizge Qazaqstannyń damýy úshin, Memleket basshysy aldymyzǵa qoıǵan barlyq maqsattardy oryndaý úshin biz jaǵymdy syrtqy jaǵdaıdy qamtamasyz etýimiz qajet», - dedi Mınıstr Almaty oblysyndaǵy «Qorǵas» Shekara mańy yntymaqtastyq halyqaralyq ortalyǵynda dıplomatııalyq korpýstyń aldynda sóılegen sózinde.
«Saıası turǵyda biz aımaqtyq yntymaqtastyq, jaqsy tatý kórshilikti nyǵaıtý, Qazaqstannyń bitimgershilik róli, Shyǵys pen Batystyń arasyndaǵy kópir salý, sondaı-aq bizdiń elimizdiń kóp jaqty dıplomatııaǵa belsendi qatysýy týraly aıtyp otyrmyz. Memleket basshysy «ekonomıkalyq dıplomatııa» salasynda odanda joǵary mindetterdi qoıyp otyr. Bul shıkizattyq emes eksportty qoldaý, belsendi saýda saıasaty, qazaqstandyq bıznesti shetelde qorǵaý jáne ilgeriletý, ınvestısııalar, tehnologııalar men úzdik álemdik tájirıbeni tartý, týrızmdi damytý», - dep atap ótti vedomstvo basshysy.
Mınıstrdiń aıtýynsha, Syrtqy ister mınıstrligi aldyna qoıylǵan mindetterdi oryndaý úshin eldegi salalyq agenttikter jáne óńirlermen tyǵyz yntymaqtastyq ornatyp, qajetti qoldaý kórsetedi. Sheteldik dıplomatııalyq mıssııalar basshylarynyń Almaty oblysyna jasaǵan sapary barysynda oblys óziniń ekonomıkalyq jáne ınvestısııalyq áleýetin tanystyrady.
«Memleket basshysy kólik-logıstıkalyq salany bólek atap ótti. Biz bul salaǵa asa mańyzdy kóńil bólýdi jalǵastyramyz, ásirese Qytaıdyń «Beldeý jáne jol» bastamasyn belsendi túrde iske asyrýyn jáne onyń qazaqstandyq «Nurly jol» baǵdarlamasymen ózara árekettesýin nazarǵa alǵanda. Bizdiń búgingi Qorǵasqa jasaǵan saparymyz osy mańyzdy jumys baǵytymen tikeleı baılanysty jáne bizdiń elderimizdiń HHI ǵasyrdaǵy Uly Jibek jolyn qaıta jańǵyrtýdaǵy ózara tıimdi yntymaqtastyǵyna jańa serpin beretinin kútemiz», - dep atap ótti SIM basshysy.
Joldaýdan shyǵatyn mindetter men olardy sheshý joldary týraly Almaty oblysynyń ákimi Amandyq Batalov pen «Qazaqstan temir joly» UK» AQ-nyń Prezıdenti Qanat Alpysbaev tolyq baıandap, sheteldik dıplomattardyń kóptegen suraqtaryna jaýap berdi.
