Ǵasyrǵa jýyq tarıhy bar bilim ordasynyń túlegi, oblystyq máslıhattyń depýtaty, «Aqshyń» korporasııasynyń prezıdenti Marat Qurmanbaıdyń demeýshiligimen jumysyn bastaǵan ortalyqtyń ashylýyna shahardaǵy zııaly qaýym ókilderi qatysty.
«Qazir eshkimdi de eshteńemen tańǵaldyra almaısyz. Adamdy eliktiretin bir dúnıe – naqty dálel. Balalarǵa tárbıeni qur sózben emes, praktıka júzinde bereıik degen oımen mektebizdiń túlegi, belgili mesenat Marat Serikjanulyna qolqa saldyq. «Siz halyqqa kóp kómek jasap jatyrsyz. Halyq qalaýlysysyz. Atyńyzdy oblys, respýblıka kóleminde tanıdy. El ıgiligi jolyndaǵy eńbekterińizdi jas býyn bilsin, úlgi alsyn. Sizdiń keshe osy mekteptiń qabyrǵasynan shyqqandyǵyńyzdy, búginde qanshama adamdy jumyspen qamtyp otyrǵanyńyzdy kórseteıik. Siz osyǵan qalaı qaraısyz?» degenimizde qarsylyǵyn bildirgen joq. Rasynda, mektepte oqyp jatqan oqýshylar osy kisiden úlgi alyp, eline qyzmet etip jatsa qandaı ǵanıbet. Bir qýanyshtysy, ortalyqtyń ashylýy Elbasymyzdyń Joldaýymen tuspa-tus kelipti. Qýanysh qutty bolsyn», - dedi ortalyqtyń ashylýynda sóz alǵan gımnazııa dırektory Alma Áýbákirova.
Bıyl 160 jyldyǵy atalyp ótip jatqan aqyn, oıshyl Shákárim Qudaıberdiulynyń shaǵyn bıýsti qoıylǵan ortalyq tórinen Memleket basshysynyń eńbekteri oryn alypty. Ortalyq qabyrǵasyndaǵy úlken taqtaǵa kásipkerdiń ómir joly, atqarǵan qyzmetteri, alǵan marapattary jaıyndaǵy derekter toptastyrylypty. Mesenattyń demeýshiligimen jaryq kórgen kitaptar da ortalyqqa qoıylypty. «1931 jyly Shubartaýda, Abyralyda, Shyńǵystaýda Sovet úkimetine qarsy kóterilister bolǵany belgili. Osy kóterilisterdiń tarıhyna kóp ýaqyt kóńil bólmeı keldik. Kóńil bólmedik emes, aıtýǵa qoryqtyq. Marattardyń erligi sony ǵylymı turǵyda negizdep, arhıvten shyǵartqyzyp, kitapqa engizip, tarıhqa aınaldyrdy. Bozdaqtarǵa keremet eskertkish ornatty. Sondaı eskertkishterdiń biri Qaınar aýylynda tur. Ultymyzdyń eń úlken qasireti – Semeı polıgony. Kásipker tarap ketken burynǵy Abyraly aýdanynyń rýhyn qaıta qalpyna keltirý, qasıetti óńirdiń atyn umyttyrmaý jolynda da aıanbaı ter tógip júr. Qaraǵandyda ótken Qaz daýysty Qazybek bıdiń toıynda tańǵaldym. Aýdan emes Abyraly óńiriniń azamattary eń bıik qazaq úıdi ornatty. Bul kıiz úı sol toıdyń kórki bolyp, júzdegen kıiz úıdiń ishinde jarqyrap turdy. Munyń bári elge, jerge, tarıhqa degen qurmet», - dedi aqyn, sazger Qusmilııa Nurqasym.
Ortalyqtyń ashylýyna muryndyq bolǵan azamat Marat Serikjanuly shara barysynda kezinde ózderi osy mektepte oqyǵanda Semeıde bar bolǵany eki-aq qazaq mektebi bolǵanyn, qazaq balalary bul bilim ordasyna alys jerden kelip oqyǵan kezderin eske aldy. «Bul mektepte meniń ákem de oqyǵan. Búginde azamat bolyp qalyptasyp, el kádesine jarap júrgenimizge osy mekteptiń, bizge tálim bergen ustazdarymyzdyń eńbegi eleýli dep bilemin. Mektepte oqyp júrgende Ilııas Jansúgirov, Sáken Seıfýllın týraly sabaq ótkende bir ustazymyzdan: «Muǵalim, osyndaı jap-jas, bilimdi jigitterdiń bári nege 38 jyly qaıtys bolyp ketken» dep suraǵanym, sondaǵy muǵalimniń kúmiljip: «Oı Marat, sol kezde qazaqtyń dalasynda oba degen aýrý bolǵan. Barlyǵy sodan qaıtys bolyp ketti» degen jaýaby oıymda qalypty. Ahmet Baıtursynov, Álıhan Bókeıhanovtyń kim ekenin, aıtylmaǵan kóp shyndyqty keıin bildik qoı. Búgin ortalyq ashylyp otyrǵan mektepke de alash qaıratkerleriniń tabany tıgen. Áıgili balýan Dáýlet Turlyhanovtyń atasy Turlyhan osy mektepte dırektor bolǵan. Sonyń bárin biz bilýimiz kerek. Bul jerde aldaǵy ýaqytta jas urpaqqa úlgi bolarlyq ártúrli kezdesýler, taǵylymdy sharalar ótedi dep oılaımyz», - dedi Marat Qurmanbaı.
Kásipker shara barysynda ortalyqtyń ashylýyna arnaıy kelgen ustazdary Jumaǵazy Dııaruly men Aıtjan Shákenqyzyn Ustazdar merekesimen quttyqtap, syı-sııapatyn tapsyrdy.
Azamat QASYM,
«Egemen Qazaqstan»
Shyǵys Qazaqstan oblysy,
Semeı qalasy
