Halyqqa Joldaýda «turǵyndardyń ál-aýqatyn kóterý», «qyzmet kórsetý sapasyn jaqsartý», «ómir súrý deńgeıin arttyrý», «halyqtyń qalaýyndaǵy memleket qurylymy», «tıimdi syrtqy saıasat», «qazaqstandyqtardyń eldegi ózgeristerge ilesýi» sekildi baǵyttar qamtyldy. Sondyqtan bul baǵdarlama adam kapıtalyn damytýdy kózdeıdi dep aıtýǵa tolyq negiz bar. Qysqasha aıtqanda, N.Nazarbaev Qazaqstandaǵy «áleýmettik memleket» qurylymyn nyǵaıtýǵa kúsh salady. Memlekettiń basty mindeti – halqyna qyzmet etý. Osy oraıda, Elbasy N.Nazarbaevtyń maqsaty Qazaqstan halqyn álemdegi básekege qabiletti ult retinde qalyptastyrý. Ony júzege asyrý adamdardyń densaýlyǵyna, bilimine, mádenıetine jáne kásipkerligine tikeleı baılanysty.
Elbasy halyqqa Joldaýynda orta jáne joǵary bilimge mańyz berdi. Osy oraıda, «4K» retinde tanylǵan «kreatıvti» (creativity), «syndarly oılaý» (critical thinking), «kommýnıkatıvtik» (communicativeness) jáne «toptyq ustanym» (command) baǵyttaryna Qazaqstannyń zamanaýı bilim júıesinde basymdyq beriledi. Uzyn sózdiń qysqasy, N.Nazarbaev Qazaqstandy álemdegi eń damyǵan memleketterdiń qataryna qosýdy kózdeıdi.
Nazarbaevtyń Qazaqstannyń tek úlken qalalary ǵana emes, ár aımaǵynyń damýyna jaǵdaı jasaýy – sarabdal saıası ustanymnyń aıqyn kórinisi.
Osy oraıda Qazaqstan kóshbasshysynyń Túrkistan oblysyn týrızm ólkesine aınaldyrý maqsatynda jasaǵan bastamasyna oń baǵa bergen jón. Jahandaný dáýirinde halyqtyń úlken qalalarǵa kóshýi ádettegi jaǵdaı jáne ony Nazarbaev túsinip otyr. Sondyqtan Qazaqstan sekildi jer kólemi jóninen álemde 9-oryndy alatyn elde aýyldyq, aımaqtyq jerlerge nazar aýdarý, ınvestısııa tartý – rasymen strategııalyq utymdy jaǵdaı.
Túrkııa tarapynan alǵanda birqatar máselege nazar aýdarý qajet. Eń birinshi, 2017 jyldan júzege asa bastaǵan «Bolashaqqa baǵdar: rýhanı jańǵyrý» memlekettik baǵdarlamasy aıasynda jasalý Ankara úshin mańyzǵa ıe. Qazaqstannyń aýylsharýashylyq jáne mádenı baılanysynda tarıhı tamyrymyzǵa mán berilýi sóz júzinde qalyp qoıǵan joq. Bul – Túrkistan oblysy men túrki áleminiń baılanysyn jandandyrý jolyndaǵy qadam. Qazaqstan ulttyq turǵyda kúsheıgen saıyn, Túrki álemi de sol sekildi nyǵaıa túsedi. Qazaqstannyń halyqaralyq saıasattaǵy bedeli artýy túrki – ıslam áleminiń baılanysy berik bolýyna áser etedi. Halyqqa Joldaýynda N.Nazarbaevtyń Túrkııany syrtqy saıasattaǵy mańyzdy áriptes sanaýy túrki áleminiń yntymaqtastyǵy jalǵasa beretinin kórsetedi.
Nazarbaevtyń halyqqa Joldaýynda bilim berý júıesi men muǵalimder taqyrybyna basymdyq berýi, sonymen qatar 2019 jyldy «jastar jyly» dep jarııalaýy – Qazaqstan úshin de, túrki álemi úshin de mańyzdy qadam. Bul – qazaq jastarynyń ósýi men álemdegi joǵarǵy deńgeıdegi básekelestikke saı bolýy úshin jasalǵan ınvestısııa. Túrkııaǵa oqýǵa kelgen qazaq jastary asa qabiletti ekenin atap aıtýǵa bolady. Sondaı-aq jastardyń kópshiliginiń Qazaqstannyń úlken qalalarynan emes, aýyldyq jerlerinen kelýi – nazar aýdararlyq jaıt. Endeshe, N.Nazarbaevtyń «Aýyl – el besigi» syndy baǵdarlamasy jáne aýyldyq jerlerdiń damýyna mańyz berýiniń strategııalyq astary tereńde jatyr.
Tutastaı alǵanda, N.Nazarbaevtyń halyqqa Joldaýy «Ash adamdy toıdyryp, kıimsizdi kıindirdim» dep, «áleýmettik memleket» túsinigin qoldaǵan Kók túrkiler memleketiniń basqarýshysy Bilge qaǵandy esimizge saldy. Baǵdarlamada aıtylǵan maqsattarǵa jetý jolynda Qazaqstannyń jańǵyrýy barysynda jańa serpilis júzege aspaq. Qazaqstan – syrtqy saıasattaǵy beıbitshilikti qoldaýy, sporttaǵy, ásirese, halyqaralyq olımpıadalardaǵy jeńisteri men ekonomıkalyq damýy, bilim júıesi arqyly túrik-ıslam áleminiń ortalyǵy bolýǵa úmitker. Shyndyǵynda, byltyr Astanada Islam yntymaqtastyǵy birinshi bilim jáne ǵylym sammıtiniń ótýi kezdeısoqtyq emes.
Mehmet Seıfettın EROL,
Ankara daǵdarys jáne saıasat zertteý ortalyǵynyń professory
Maqalany aýdarǵan
Svetlana ǴALYMJANQYZY,
«Egemen Qazaqstan»
