Memleket basshysy alqaly jıynda mysal retinde keltirgen «Bórte-Mılka» keshendi sút fermasy búginde qanatyn keńge jaıyp, sapaly ónimderi suranysqa ıe bolýda. Osy sút ónimderin óńdeý keshenin Elbasynyń 2015 jylǵy Joldaýynan keıin ashqan bolatynbyz. Sol Joldaýda kóterilgen bastamalarǵa súıenip, aıqyn maqsattardy negizge ala otyryp iske kiristik. Mine, arada úsh jyl ótti, búginde jemisin halyq kórip jatyr. Bizdiń keshendi ferma Joldaý júktegen mindetterdiń júzege asyrylyp jatqanyn bildiretin nátıjeli bir ǵana mysaly der edim. Elbasynyń Aqordada otyryp, aýyldaǵy bizdiń jaǵdaıymyzdy, jumysymyzdyń nátıjesin jaqsy biletini halyqqa etene jaqyn ekendigin taǵy bir dáleldep otyr. Telearna aldynda Joldaýdy tyńdap otyrǵan ujymymyzdyń qýanyshynda shek joq. Bizge bul jaıt qosymsha kúsh-qýat berdi. Búginde sút óńdeý boıynsha kórsetkishterimiz de, sapa da joǵary. Soǵan sáıkes jumysshylardyń aılyǵy da kóbeıgen. Seriktestikte 70 adam jumys isteıdi, ortasha aılyq 100-200 myń teńge aralyǵynda. О́nim kóleminiń, sapasynyń artýy sońǵy tehnologııalarmen jabdyqtalýǵa tikeleı baılanysty. Aqyldy tehnologııalardy óndiriske engizýdiń nátıjesinde sıyrlardy saýynshy emes, robot saýady. Mamandarymyzǵa jańa tehnologııalardy meńgertý, Elbasy Joldaýynda aıtylǵan robottandyrylǵan júıeler men ózge de ınnovasııalardy engizý arqyly sút óndirisin 2 esege kóbeıttik. Eki jyl buryn golshtın tuqymdas 400-den astam Zeńgi baba tólin satyp alǵan bolatynbyz. Qazir mal basy 900-den asty. Qaıta tereń óńdelgen ónim elimizdiń túkpir-túkpirine tasymaldanýda.
Elbasy Joldaýynda 2022 jylǵa qaraı eńbek ónimdiligin ulǵaıtyp, óńdelgen aýyl sharýashylyǵy ónimderiniń eksportyn 2,5 esege arttyrý kerektigi aıtyldy. Biz ónimderimizdi eksportqa shyǵarýǵa birtindep jaqyndap kelemiz. Qazir aldymen óz tutynýshylarymyzdyń suranysyn tolyq qamtamasyz etý maqsatynda jumys isteýdemiz. Eshqandaı qospasyz taza tabıǵı bolǵandyqtan, ónimderimizdiń saqtalý merzimi – 7 kún. Suranystyń bolýy osyǵan da baılanysty shyǵar. Aldaǵy ýaqytta da seriktestik jańa jobalardy júzege asyryp, tutynýshylardy otandyq ónimmen qamtamasyz etýge qomaqty úlesin qosatyn bolady.
Nuraly ÁBIShEV,
«Bórte-Mılka» JShS quryltaıshysy, dırektory
Túrkistan oblysy
