Ortalyqtyń, jergilikti Ekonomıka joǵary mektebi men Q.Jubanov atyndaǵy Aqtóbe óńirlik memlekettik ýnıversıtetiniń arasynda ornaǵan tyǵyz yntymaqtastyqtyń barysynda, Qazaqstan tarapynyń bastamasymen ashylǵandyǵyn aıtý qajet.
Aıdyny kúmisteı jarqyraǵan kóptegen kanaldar kelbetine ózindik erekshe sıpat bergen osybir jasyl shahardyń kórikti jerleriniń birinde oryn tepken oqý ordasyndaǵy sharaǵa qala basshysy Rafal Brýskıı, Qazaqstannyń Polshadaǵy elshiliginiń konsýly Azamat Balabekov, Polshanyń Kýıav – Pomor voevodtyǵy Shýbın qalasynyń basshysy Artýr Mıhalak, Q.Jubanov atyndaǵy Aqtóbe óńirlik memlekettik ýnıversıtetiniń rektory Baýyrjan Erdembekov, Qapshaǵaı qalasy ákimdiginiń ókili Natalıa Nosova, sonymen qatar qala joǵary oqý oryndarynyń professorlyq-oqytýshylyq quramy, qazaqstandyq jáne jergilikti stýdentter qatysty.
Alǵashqy sóz alyp, jıyndy ashqan Ekonomıka joǵary mektebiniń prezıdenti Kshıshtof Sıkora myrza ortalyqtyń qazaq mádenıetin nasıhattaıtynyn tilge tıek etip, qazaq-polıak baılanystarynyń odan ári qarqyndy damı berýine tilektestik bildirse, kezekti bolyp sóz sóılegen elimizdiń Polshadaǵy konsýly búgingi kúni qos memleket arasyndaǵy qatynastardy nyǵaıtýǵa qajetti barlyq jaǵdaıdyń jasalǵandyǵyn aıta kelip, tusaýkeseri ótkizilgen «Qazaq Eli» mádenıet ortalyǵyna memleketimiz týraly aqparattyq sıpattaǵy eńbekterdi, sonymen birge aqyn-jazýshylarymyzdyń kórkem týyndylaryn syıǵa tartty.
Elimizdiń Pavlodar qalasymen baýyrlas qala statýsyndaǵy Bydgosh shaharynyń basshysy bolsa geografııalyq turǵydan eki memlekettiń alshaq ornalasqandyǵyna qaramastan, qazaq-polıak baılanystarynyń uzaq dástúri bar ekendigin aıta kelip, ortalyqtyń sol baılanystardy nyǵaıta túsetindigine senim bildirdi. Tanymal saıasatker óz sóziniń sońyn: «Baılanystarymyzdyń eń mańyzdy quramdasy – jastar. Olar óz mádenıetiniń ókili, shynaıy elshisi qyzmetin atqarady» dep qorytyndylady.
Al Q.Jubanov atyndaǵy Aqtóbe óńirlik memlekettik ýnıversıtetiniń rektory Baýyrjan Erdembekov keler jyly Aqtóbe óńirlik ýnıversıtetiniń bazasynda «Polıak mádenıet ortalyǵyn» ashý josparlanǵanynan habardar etti. Sonymen birge ol ózi basqaratyn oqý ordasy men Bydgosh Ekonomıka joǵary mektebiniń arasyndaǵy tyǵyz yntymaqtastyqty sóz etip, sońǵy bes jylda «Erazmýs +» jáne «Akademııalyq utqyrlyq» baǵdarlamalarynyń aıasynda elý shaqty aqtóbelik stýdenttiń atalǵan áriptes oqý ornynda bilim alǵandyǵyn málim etti.
Saltanatty rásimniń sońyn ala minberge kóterilgen Shýbın qalasynyń býrmıstri Artýr Mıhalak ózi basqaratyn shaǵyn qalanyń Qapshaǵaı qalasymen yntymaqtastyqta ekendigin aıta kelip, ózi kýá bolǵan qazaq halqyna tán ózge din jáne mádenıet ókilderine degen toleranttylyqty, ata-babasyn jadynan shyǵarmaý jáne shyqqan tegin bilý, qonaqjaılylyq syndy qasıetterdi erekshe yjdahattylyqpen sóz etti.
Saltanatty sharanyń sońy Qapshaǵaı qalasynan arnaıy kelgen dástúrli ánshi ári kúıshi Gúlsim Bekbosynova men Q.Jubanov atyndaǵy Aqtóbe óńirlik memlekettik ýnıversıteti ónerpazdarynyń konserttik baǵdarlamasyna ulasty.
Jandos ÁÝELBEKULY,
arnaıy «Egemen Qazaqstan» úshin
Polsha
Bydgosh qalasy
