Osydan alpys jylǵa jýyq ýaqyt buryn alǵashqy qonaqtaryn qabyldaǵan qonaqúıge ár jyldary qazaqtyń maıtalman óner sheberleri, memleket jáne qoǵam qaıratkerleri syndy kórnekti tulǵalar aıaldaǵan. О́tken kúnderdiń esteligi retinde «Jambyl» qonaqúıinde «Keńes kezeńindegi «Jambyl» qonaqúıi» atty shaǵyn mýzeı ashyldy. Kóptiń qyzyǵýshylyǵyn týdyryp otyrǵan bul mýzeı – Áýlıeata óńirindegi qonaqúılerdegi alǵashqy bastama.
Shaǵyn mýzeıdiń ashylý saltanatynda sóz alǵan Jambyl oblystyq týrızm basqarmasynyń basshysy Qarlyǵash Aralbekova sońǵy jyldary kóptegen týrısterdiń mýzeılik týrızm salasyna qyzyǵýshylyq tanytyp otyrǵandyǵyn atap ótti. «Talaı tarıhı sátterdi este qaldyrý maqsatynda qonaqúı janynan shaǵyn mýzeıdiń ashylýy quptarlyq is. Qazirgi týrıster qaı óńirge kelse de, sol jerdegi tarıhı oryndarmen tanysýǵa qushtar. Endi Áýlıeata óńirine kelgen týrıster «Jambyl» qonaqúıine aıaldap qana qoımaı, óńir tarıhymen de jaqsy tanysa alady», dedi ol.
Sonymen qatar shara barysynda «Qarahan» jýrnalynyń bas redaktory Satybaldy Dosymbekov tarıhı derekter negizinde sóz sóılep, «Jambyl» qonaqúıi men Taraz qalasy Tóle bı kóshesiniń boıyndaǵy Jambyl Jabaev eskertkishiniń jyr alybynyń 115 jyldyǵyna oraı bir kúnde ashylǵanyn aıtty.
Jýyrda ashylǵan shaǵyn mýzeı keńestik úlgide jabdyqtalǵan qonaqúı bólmesinde uıymdastyrylǵan. Bólmedegi aspaly shamdar, tósek oryndary men jazý ústeliniń ózi ótken kúnniń esteligindeı bolyp tur. Bir sózben aıtqanda, kóne shahardyń keshegi kelbeti beınelengen shaǵyn mýzeı endigi jerde kóptegen týrısterdiń qyzyǵýshylyǵyn oıatyp, kóne Taraz týraly maǵlumat alatyn ornyna aınalatyn bolady.
Hamıt ESAMAN,
«Egemen Qazaqstan»
Jambyl oblysy
