Baıyp ketseń baılyqqa kóp qunyqpa,
Júrektegi ımanyńdy sýytpa.
Eı, baýyrym, sol baılyqty Allanyń,
О́zi berip, ózi alaryn umytpa.
Osy sózdi oqyǵannan keıin onyń qazaq tilin biletinine esh kúmánimiz qalmaǵan. Iá, Ekaterına ózge ult ókilderi kóp qonystanǵan Shemonaıha aýdanynda turady eken. Qazir aýdan ortalyǵyndaǵy Mádenıet úıinde ánshi bolyp jumys isteıtin ol 1991 jyly Besqaraǵaı aýdanynyń Boztal aýylynda dúnıege kelipti. «Qazaq tilin osyndaǵy mektepke barǵannan keıin úırendim. Apam men ákem úıde oryssha sóıleıtin. Biz osy aýyldaǵy jalǵyz orys otbasy boldyq. Jasyratyny joq, mektepke barǵan kezde qıyndyqtar kezdesti. «Mektepke barǵym kelmeıdi, oqyǵym kelmeıdi, qazaq balalar bizdi bóledi» dep jylaǵan kezderimiz de boldy. Apaıym men sińilim de osy mektepte oqydy. Ne kerek, aqyr sońynda qazaqshaǵa sýdaı bolyp shyqtyq qoı», – deıdi Ekaterına.
Ekaterına Boztaldaǵy mektepti bitirgennen keıin Shemonaıhadaǵy gýmanıtarlyq-tehnıkalyq kolledjde «Dene shynyqtyrý» mamandyǵy boıynsha bilim alǵanymen búginde óner jolynda ter tógip júr. О́ziniń aıtýynsha, repertýarynda 30-dan astam qazaq áni bar. «Bir tylsym kúsh meni óner salasyna jetelegendeı boldy. Áıtpese eshqandaı mýzykalyq bilimim joq. «Dedim-aı, aý», «Kózińniń móldirin-aı» degen sekildi halyq ánderin oryndaǵandy jaqsy kóremin. Gúlmıra Sarına shyrqaıtyn «Shyǵysym, shyraıly elim» ánin de jıi aıtamyn. «Keshikpeı kelem dep eń» dep, Shámshi ánderin de áýeletemin. Tamara Asar, Roza Álqoja, Erke Esmahannyń ánderi de júregime jaqyn. Repertýarymda oryssha ánderden góri qazaqsha ánder kóp. Qazir toılarǵa da jıi shaqyrady. О́zimniń áriptesim Nurbolat Raıysov ekeýmizdiń «Aqnıet» dep atalatyn dýetimiz bar», – deıdi keıipkerimiz.
Ekaterına – qazaqtyń kelini. Búginde joldasymen birge Aıaýlym, Narıman esimdi ul men qyzdy tárbıelep otyr. «Baıyp ketseń baılyqqa kóp qunyqpa, Júrektegi ımanyńdy sýytpa» dep óziniń áleýmettik jelidegi paraqshasyna jazǵanyndaı, osydan 10 jyl buryn ıslam dinin qabyldapty. «Islam dinin turmysqa shyqpaı turyp qabyldadym. Qazaq tili týǵan tilim sııaqty. Shynyn aıtsam, orys tilinen góri oıymdy qazaqsha ońaıyraq jetkizemin. Qyzymyz Aıaýlym oryssha mektepke, ulymyz Narıman qazaqsha balabaqshaǵa barady. Úıde bárimiz qazaqsha sóılesemiz. О́zge ult ókilderiniń sany basym bolǵandyqtan Shemonaıhada halyqtyń kóbi oryssha sóıleıdi. Joldasym keı kezderi qazaqshadan góri oryssha kóp sóılep ketedi. Keıde oǵan da qazaqsha úıretip jiberetinim bar (kúldi). Shemonaıhalyqtar meniń qazaqshama áýelde tańǵalatyn, qazir úırenip alǵan sekildi. «Qazaqstanda turatyn árbir azamat qazaq tilin bilýi kerek. Aqyryndap meńgerýi kerek» dep únemi aıtyp júremin. О́ıtkeni qazaq tili – maqtanyshymyz, bolashaǵymyz», – deıdi ol.
Ekaterına Beısembaeva byltyr Glýbokoe aýdanynda ózge ult ókilderi arasynda ótken oblystyq «Abaı oqýlary» baıqaýynda jeńimpaz atanypty. Tarbaǵataı aýdanynda uıymdastyrylǵan «Tarbaǵataı juldyzdary» halyqaralyq án baıqaýyna qatysypty.
Ana tilimizdi ardaqtaýdyń úzdik úlgisin kórsetip júrgen jannyń endigi bir armany – joǵary bilim alý. «Semeı men О́skemenniń birinde mýzykalyq bilim alyp, ónerimdi odan ári shyńdaı tússem deımin. Jáne osy múmkindikti paıdalanyp meni únemi qoldap, baǵyt-baǵdar berip júretin aýdandyq Mádenıet bóliminiń basshysy Álııa Selteeva men Mádenıet úıiniń dırektory Qaraqat Atahanovaǵa alǵysymdy jetkizgim keledi», – deıdi Ekaterına.
Áriptesteriniń Ekaterınaǵa degen qurmeti ózgeshe. «Katıany erekshe jaqsy kóremiz. Qazaq tilinde jetik sóıleıdi. Qazaqtyń salt-dástúrin ustanady. Osynda ótetin keshterdi qazaq tilinde júrgizedi. Qazaqtyń ánderin shyrqaıdy. Bizdiń Mádenıet úıinde jumys isteıtin ónerpazdardyń kópshiliginiń kásibı bilimderi bolmasa da, tabıǵı talanttarymen jurtshylyqty tamsantyp júr. Katıa da sondaı óner ıesi. Eki bala tárbıelep otyr. О́zi qarapaıym. Eńbekqor. Bizdiń aýdanda 80 prosent ózge ult ókilderi turady. Qazaqtyń salt-dástúrin bilmeıtin qazaqtar da bar. Al bizdiń Katıa ulty orys bolsa da, maǵan qazaq sekildi kórinedi», – deıdi aýdandyq Mádenıet úıiniń dırektory Qaraqat Atahanova.
Azamat QASYM,
«Egemen Qazaqstan»
Shyǵys Qazaqstan oblysy,
Shemonaıha aýdany
