Ol óziniń óner jolynda qazaqtyń nebir kúmis kómeı, jeztańdaı ánshilerimen áriptes boldy. 1936 jyly Qazaq óneri men ádebıetiniń Máskeýde ótken onkúndigine qatysyp, úkimet adamdarynyń nazaryna ilikti. Jabaıdyń repertýarynda jalpy toqsanǵa jýyq án bolǵan eken. Onyń kópshiligi Birjannyń, Aqan seriniń, Jarylǵapberdiniń, Jaıaý Musanyń ánderi edi.
Jabaıdyń jastyq shaǵy óte aýyr jaǵdaıda ótti. Áke-shesheden úsh jasqa jetpeı jetim qalǵan jas, besikten beli shyqpaı jatyp kúnkóris qamymen baıdyń qozysyn baqty. On bes jasqa tolǵanda boıy eki jarym kez, eki ıyǵyna eki kisi mingendeı jıyrma bes jastaǵy jigit tárizdi kórindi. Erjete kele eren kúsh atasy Jabaı san ret kúreske túsip júldeli oryndardy ıelendi. Ekibastuz, Qaraǵandy qalalaryndaǵy shahtalarda jumys istedi. Kemede júkshi boldy. Onyń:
Bir kezde turmys meni bılegendi,
Joqshylyq, múshkil ómir ılegendi.
Júrgende parahodta qap arqalap,
Qabyrǵam aýyr júkten kúıregendi.
Talaı jyl júk kóterip júrdim qajyp,
Otyrdym tabys jetpeı júdep, azyp.
Jubatqan ońashada jan serigim,
Dombyram, óleńimmen bolǵan azyq, – degen óleń joldary muny aıǵaqtaı túskendeı. Sodan 1916 jyly maıdannyń qara jumysyna alynyp Rıga qalasynyń túbinen bir-aq shyqty. Ashtyq, aýyr jumys er jigitti moıyta almady. Ol aman-esen elge oralyp kózdegen maqsatyna jetti. Úkimet onyń eńbegin joǵary baǵalap respýblıkalyq dárejedegi zeınetaqy taǵaıyndady. Ánderin jeke dısk etip shyǵartty. Ánshi, kompozıtor Jabaı Nurjanuly toqsanǵa qaraǵan shaǵynda 1978 jyly Baıanaýyl aýdanynyń Jańatilek eldi mekeninde dúnıeden ozdy. Qazaqstannyń eńbek sińirgen ártisi Jabaı Nurjanulynyń týǵanyna keler jyly 130 jyl. Onyń sońynda óshpes óneri qaldy.
Muhamet-Qaıyr ShÁRIPOV
Pavlodar oblysy,
Baıanaýyl aýdany
