Konferensııada matematıka, ınformatıka jáne aqparattyq-matematıkalyq modeldeýdiń ózekti máseleleri, sonymen qatar, jaratylystaný pánderin sapaly oqytý, sıfrlandyrý jáne aqparattandyrý, aqparattyq jáne esepteý tehnıkasynyń damýynyń jaı-kúıi men keleshegi, «Informatıka» pánin zertteýdiń maqsaty men mazmuny, ınjenerlik bilim barysy talqylandy.
Konferensııa jumysyna Máskeý pedagogıkalyq memlekettik ýnıversıtetiniń rektory, Eýrazııalyq pedagogıkalyq ýnıversıtetter qaýymdastyǵynyń prezıdenti Alekseı Lýbkov, Eýrazııalyq pedagogıkalyq ýnıversıtetter qaýymdastyǵynyń (EAPU) atqarýshy dırektory Edýard Nıkıtın, Pomor akademııasynyń rektory, professor Zbıgnev Osadovskıı (Polsha, Slýpsk q.), Pedagogıkalyq ýnıversıtetiniń qurmetti rektory Hans Schachl (Avstrııa), Hachatýra Abovıan atyndaǵy Armıan memlekettik pedagogıkalyq ýnıversıtetiniń qurmetti rektory Srbýı Gevorkıan, RBA korrespondent-músheleri, MQPÝ, V.P.Astafev atyndaǵy Krasnoıar memlekettik pedagogıkalyq ýnıversıteti, PMUZÝ, M.V. Lomonosov atyndaǵy MMÝ ýnıversıtetteriniń professorlary jáne Qazaqstan joǵary oqý oryndarynyń ókilderi qatysty.
Is-shara aıasynda «Pedagogıkalyq STEM-parktiń» ashylý saltanaty ótti. Keńeıte aıtqanda, STEM – Science, Technology, Engineering, Math baǵyttarynyń basqy áripteriniń qurylymy, al «Pedagogıkalyq STEM-park» – bilim berý, ǵylym jáne bıznes júıesindegi áriptestiktiń jańa formaty.
Konferensııanyń ashylýynda rektor Takır Balyqbaev Qazaqstannyń pedagogıka salasyndaǵy jetekshi ǵylymı jáne bilim berý ortalyǵy bolyp tabylatyn Abaı atyndaǵy QazUPÝ-dyń jetistikteri men áleýeti týraly baıandap, konferensııa taqyrybynyń ózektiligine toqtala kele aldaǵy kezeńde sheteldik áriptestermen birlese daıyndalǵan jańa oqý jospary júzege asatyndyǵyn atap ótti.
Konferensııanyń birinshi bóliminde Tamagawa university professory Seiji Moriya (Japonııa), professor RǴA akademıgi, pedagogıka ǵylymdarynyń doktory, Omby memlekettik pedagogıkalyq ýnıversıtetiniń professory Mıhaıl Lapchık, fızıka-matematıka ǵylymdarynyń doktory, Perm memlekettik ulttyq zertteý ýnıversıtetiniń professory Evgenıı Henner, MMPÝ professory Sergeı Grıgorev, Qazaqstan Respýblıkasy UǴA akademıgi, Aqparattyq jáne esepteýish tehnologııalar ınstıtýtynyń professory Maqsat Kalımoldaev baıandama jasasa, Abaı atyndaǵy QazUPÝ-dyń birinshi prorektory Maqtaǵalı Bektemesov jetekshilik jasaǵan konferensııanyń ekinshi bóliminde ǵalymdar sıfrlyq tehnologııalardy tıimdi paıdalaný joldary, sıfrlyq modeldeý ádisteri men gaz qospalarynda kınetıkalyq aýysý sıpattamasynyń erekshelikteri, bıologııa jáne medısınadaǵy keri áreketterdi sáıkestendirý tásilderi, joǵary bilim berýdegi pedagogıkalyq ólshemder tájirıbesine qatysty pikirlerimen bólisti.
Ǵalymdar sonymen qatar sıfrlandyrýdyń artyqshylyqtaryn paıdalaný múmkindikterin, joǵary oqý oryndarynyń oqý úrdisine IT-tehnologııalardy engizýde otandyq jáne sheteldik tájirıbeni jınaqtaý, bilim berý uıymdarynyń qyzmetkerleriniń sapasyn arttyrý jáne jetildirý máselelerine qatysty da kókeıtesti jaıttardy qarastyrdy. Búginde sıfrlandyrýdyń áleýeti zor. Osy turǵydan alǵanda onlaın-kýrstar, trenıngter jáne bilim alýdyń ınnovasııalyq ádisteri joǵary suranysqa ıe.
Qazirgi ýaqytta tıisti zertteýler atalǵan ýnıversıtettegi Bilim berýdi jáne bilim berý tehnologııalaryn aqparattandyrý máseleleri halyqaralyq ǵylymı zerthanasy men «Informatıka jáne bilim berýdi aqparattandyrý» kafedrasynda júzege asýda.
Eki kúnge sozylǵan halyqaralyq konferensııa sessııasy otandyq jáne sheteldik ǵalymdar úshin bilimdi sıfrlandyrý jaǵdaıyndaǵy kóptegen mańyzdy tájirıbelermen bólisýge múmkindik berdi.
Elvıra SERIKQYZY,
«Egemen Qazaqstan»
ALMATY
