Álemdik qoıylymǵa qatysý úshin vokaldyq oryndaýshylarǵa kastıg jarııalandy. Qatysýshylardy mıýzıkldiń álem moıyndaǵan sheberi, «Notre dame de Paris» áıgili qoıylymynyń avtorlarynyń biri R.Kochchante qabyldaıdy. Mıýzıkl R.Kochchanteniń mýzykanyń garmonııalyq úndesiminiń arqasynda shedevrge aınaldy. Kastıngte ataqty maestromen qatar Fransııanyń prodıýserleri de qatysady.
Otandyq talanttarymyzǵa áıgili qoıylymǵa qatysý múmkindigi týyp otyr. 18-38 jas aralyǵyndaǵy vokaldyq ánshilerge arnalǵan kastıng 8, 9,10 qazan kúnderi saǵat 9.00-den 19.00-ge deıin «Qazaqstan» ortalyq konsert zalynda ótedi.
«Notre dame de Paris» – álemdik mádenıettiń jaýharyna aınalǵan erekshe týyndy. Ýaqyt synynan ótip, talǵampaz kórermenniń ystyq yqylasyna bólengen mıýzıkl eshkimdi beıjaı qaldyrmasy anyq. Alǵashqy qoıylymynan-aq úlken tabysqa qol jetkizgen mıýzıkl ataqty klassık jazýshy V.Gıýgonyń romanynda baıandalǵan shynaıy mahabbat pen satqyndyq oqıǵasy, fransýzdyq shanson men syǵan motıvine qurylǵan ásem áýezdi mýzyka, ǵajaıyp pen sıqyrǵa toly sırk jáne akrobattar ónerimen órnektelgen. Mıýzıkl jelisinde oryndalatyn «Belle», «Danse mon esmeralda», «Le Temps des Cathedrales» sekildi elýge jýyq ánniń áýeni tyńdarmandy birden baýraıdy. Buǵan deıin atalmysh mıýzıkl álemniń 9 tiline aýdarylǵan. Endi, áıgili mıýzıkldiń keıipkerleri qazaq tilinde onynshy bolyp ún qatady.
20 jyl buryn alǵash ret Parıj qalasynda qoıylǵan mıýzıkldiń qazaq sahnasynyń tórinen tabylýy elordamyz Astananyń 20 jyldyq mereıtoıymen tuspa-tus kelip otyr. «Notre dame de Paris» mıýzıkliniń qoıylymy zamanaýı Qazaqstannyń tarıhyndaǵy aıtýly oqıǵa bolary anyq.
