Rásim barysynda Qazaqstan Prezıdenti Nursultan Nazarbaevqa Qytaı Halyq Respýblıkasynyń Tótenshe jáne ókiletti elshisi Chjan Sıao, Ispanııa Koroldiginiń Tótenshe jáne ókiletti elshisi Davıd Artýro Karrıedo Tomas, Izraıl memleketiniń Tótenshe jáne ókiletti elshisi Lıat Vekselman, Slovakııa Respýblıkasynyń Tótenshe jáne ókiletti elshisi Mılan Kollar jáne Eýropa Odaǵynyń Tótenshe jáne ókiletti elshisi Sven-Olov Karlsson senim gramotasyn tapsyrdy.
Nursultan Nazarbaev elshilerdi Qazaqstandaǵy dıplomatııalyq mıssııalarynyń resmı túrde bastalýymen quttyqtap, olarǵa memleketaralyq qatynastardy damytý jáne ony odan ári ilgeriletý isinde tabys tiledi.
– Sizderdiń mıssııalaryńyzdyń bastalýy el damýynyń mańyzdy kezeńimen tuspa-tus kelip otyr. Bizdiń strategııalyq baǵytymyz – álemniń ozyq damyǵan 30 eliniń qataryna qosylý. Osyǵan oraı, qajetti baǵdarlamalardyń bárin qabyldap, keshendi reformalardy júzege asyryp kelemiz, – dedi Memleket basshysy.
Qazaqstan Prezıdenti álemdik daǵdarys kúsheıgen jaǵdaıda senimdi memleketaralyq qatynastar ornatýdyń mańyzdy ekenin aıtty.
– Jaqynda Nıý-Iorkte ótken Birikken Ulttar Uıymy Bas Assambleıasynyń kezekti sessııasynda keıbir elder arasynda «senim daǵdarysynyń» odan ári órshı túskeni anyq baıqaldy. О́zara senim ornyqpasa, daǵdarysqa qarsy kez-kelgen is-qımyldyń oń nátıjesi bolmaıdy, – dedi Nursultan Nazarbaev.
Memleket basshysy halyqaralyq jáne óńirlik qaqtyǵystardy retteý úshin Qazaqstannyń júrgizip otyrǵan kópvektorlyq saıasaty men kúsh-jigeriniń tıimdiligin atap ótti.
Elbasy Qazaqstan men Qytaı arasyndaǵy qarym-qatynastardyń qazirgi jaǵdaıy men damý perspektıvalaryna arnaıy toqtaldy.
– Qazaqstan Qytaımen jan-jaqty strategııalyq yntymaqtastyqty damytýǵa erekshe mán beredi. Dıplomatııalyq baılanys ornaǵan sátten bastap biz tatý kórshilik jáne ózara túsinistik rýhynda damyp kele jatqan memleketaralyq qatynastardyń úlgili modelin qurdyq. Búginde eki eldiń úkimetteri ózara kelisimderdi júzege asyrý úshin belsendi jumys atqarýda. «Nurly jol» jańa ekonomıkalyq saıasatyn «Jibek jolynyń ekonomıkalyq beldeýi» bastamasymen ushtastyrý jónindegi yntymaqtastyqqa erekshe kóńil bólinip otyr, – dedi Memleket basshysy.
Sondaı-aq, Nursultan Nazarbaev bıyl elimizdiń Eýropa Odaǵymen dıplomatııalyq qatynas ornatqanyna 25 jyl tolǵanyn atap ótti.
– Qazirgi basty mindetimiz – 2015 jyly qol qoıylǵan Qazaqstan men Eýroodaq arasyndaǵy Keńeıtilgen áriptestik pen yntymaqtastyq týraly kelisimdi júzege asyrý. Sondaı-aq, Brıýsseldiń Ortalyq Azııa elderine qatysty jańa strategııasyn ázirleýge kúsh jumyldyrý kerek. Biz Qazaqstan men Eýroodaq arasyndaǵy vızalyq rejimdi jeńildetý máselesi durys sheshimin tabady dep senemiz, – dedi Qazaqstan Prezıdenti.
Rásimge qatysýshylar aldynda sóılegen sózinde Memleket basshysy Qazaqstan men Ispanııa Koroldigi arasyndaǵy qatynastardyń strategııalyq sıpatyn atap ótti.
– 2017 jyly maýsym aıynda Uly Mártebeli Ispanııa Koroli VI Felıpe Qazaqstanǵa alǵashqy resmı saparmen kelip, «EKSPO-2017» halyqaralyq kórmesiniń ashylýyna qatysty. О́zara ýaǵdalastyqtarymyzdy júzege asyrýǵa Ekonomıka jáne ónerkásip salasyndaǵy yntymaqtastyq týraly úkimetaralyq komıssııa men Iskerlik keńes zor úles qosyp keledi, – dedi Nursultan Nazarbaev.
Sondaı-aq, Elbasy ekonomıkanyń túrli sektorynda Qazaqstan men Izraıl arasyndaǵy qatynastardy odan ári damytýǵa múddeli ekenin bildirdi.
– 2016 jyly Izraıl Premer-Mınıstri Bınıamın Netanıahýdyń Qazaqstanǵa resmı sapary jáne sonyń barysynda ótken bıznes-forým ózara yqpaldastyǵymyzdyń aıasyn keńeıtýge tyń serpin berdi. Biz ózara qatynastarymyzdy, ásirese aýyl sharýashylyǵy, ınnovasııalyq tehnologııalar jáne densaýlyq saqtaý salalaryn odan ári damytýǵa múddelimiz, – dedi Memleket basshysy.
Qazaqstan Prezıdenti Slovakııamen yntymaqtastyqtyń oń qarqynyn atap ótip, eki el arasyndaǵy saýda aınalymyn arttyrýdyń jáne ekonomıkalyq yntymaqtastyqtyń jańa baǵyttaryn damytýdyń mańyzdy ekenin aıtty.
– Saýda-ekonomıkalyq baılanystardy nyǵaıtýǵa Ekonomıkalyq jáne ǵylymı-tehnıkalyq yntymaqtastyq jónindegi úkimetaralyq komıssııa zor úles qosyp keledi. Bolashaqta bizge taýar aınalymyn ulǵaıtyp, ózara ekonomıkalyq qatynastardy damytýdyń jańa baǵyttaryn aıqyndaý qajet, – dedi Nursultan Nazarbaev.
Rásim sońynda Memleket basshysy dıplomattardy Qazaqstandaǵy jaýapty mıssııalarynyń bastalýymen taǵy da quttyqtady.
