Qazaqstanda «Konfederasııa kýbogy» osymen úshinshi jyl qatarynan uıymdastyrylyp otyrǵanyn aıta keteıik. Jarystyń irikteý týry elimizdiń 4 qalasynda ótedi. Kelesi kezdesý qazannyń 13-14 kúnderi Taldyqorǵan qalasynda ótedi. Oǵan Almaty, Aqtóbe, Qaraǵandy oblystary men Astana jáne Shymkent qalalarynyń quramalary qatysady. Odan keıingi kezeńderdiń kestesine sáıkes, Semeıde qazannyń 20-21 kúnderi Shyǵys Qazaqstan, Qostanaı, Batys Qazaqstan jáne Pavlodar oblystary sportshylarynyń sheberligi synalady.
«Jarys alǵash uıymdastyrylǵan jyly Soltústik Qazaqstan oblysynyń grek-rım quramasy úshinshi oryn alǵan bolatyn. Al byltyr jolymyz bolmady. Sondyqtan bıyl barynsha tyńǵylyqty daıyndaldyq. Túrkistan oblysynyń sportshylary myqty bolǵanyn moıyndaý kerek. Degenmen, qyzyljarlyqtar basym tústi. Endi jeltoqsan aıynda Almaty qalasynda ótetin jarysqa daıyndalamyz», – deıdi grek-rım kúresinen SQO quramasynyń aǵa bapkeri Qonysbek Túkenov.
Kelesi kezdesý jeltoqsan aıynda Almaty qalasyndaǵy Balýan Sholaq atyndaǵy sport saraıynda ótedi.
«Jarys tartysty ótti. О́zim – Túrkistan oblysynyń erkin kúres qurama komandasynyń múshesimin. Búgingi dodaǵa bizdiń óńirden saıdyń tasyndaı iriktelgen 6 balýan keldi. 86 keli salmaq járejesinde boz kilemge úsh ret shyǵyp, alqashqysynda qyzylordalyq Ǵalymjan Nóserbaevtan jeńilip qaldym. Sońǵy ekeýinde qarsylasymnan basym tústim. Uıymdastyrýshylarǵa alǵysym sheksiz», – dedi QR sport sheberi, túrkistandyq Saıd Abbazov.
Konfederasııa kýbogy 6 sport túri boıynsha uıymdastyrylady. Atap aıtar bolsaq: boks, taekvan-do, dzıýdo, grek-rım, qazaq jáne erkin kúres. Bul Qazaqstanda ótetin saıystardyń ishinde júlde qory eń kóbi. Uıymdastyrýshylardyń sózine qaraǵanda, 5 olımpıadalyq sport túriniń árqaısysyna 25 mıllıon teńgeden bólingen. Qazaq kúresi elimizde jańa damyp kele jatqan sport túri bolǵandyqtan onyń júlde qory 20 mıllıon teńge.
О́mir ESQALI,
«Egemen Qazaqstan»
