Sýretti túsirgen: Valerıı Býgaev
Oblystyq qurylys basqarmasynyń habarynsha, Pavlodar men Ekibastuz qalalarynda «7-20-25» baǵdarlamasy boıynsha 305 páter satylymǵa shyǵaryldy. Jyl sońyna deıin bul tizimge taǵy 400-ge jýyq páter qosylmaqshy. Ekibastuzda 180 páter, bes qabatty úsh úı «Turǵyn úı qurylys jınaq banki» AQ arqyly salynǵan bolatyn. Páterlerdiń bir sharshy metri 145-150 myń teńge. Oblystyq jáne jergilikti bıýdjet esebinen sýbsıdııalandy, endi páterlerdiń bir sharshy metrin turǵyndar 100 myń teńgege satyp ala alady.
О́ńirdegi «Klochan», «Álem-PVL», «Arýjan», «Chaıgazınov» qurylys kompanııalary belsendilik tanytyp, turǵyn úı qurylysyna kirisip te ketipti О́kinishke oraı, bank ókilderiniń aıtýynsha, baǵdarlama boıynsha páter alýdyń tıimdi tetikterin túsindirý jumystary nashar. Turǵyndarǵa túsinik jumystary da jetpeýde.
Jalpy, óńirde «7-20-25» baǵdarlamasy boıynsha páter alý úshin páter quny 15 mıllıon teńgeden aspaýy tıis. Aı saıynǵy tólem kólemin anyqtaý úshin Ulttyq bank saıtyndaǵy esepteý kómegine júginý kerek. Baǵdarlama aıasynda páter alý úshin jalaqy 180 myń teńgeni quraýy tıis. О́tinish berýshiniń 25 jyl boıy aı saıyn 80 myń teńge tóleı alatyny anyqtalady.
Oblys ortalyǵyndaǵy «Saryarqa» shaǵyn aýdanynda 8 turǵyn úı salý boıynsha memlekettik konkýrs jarııalanady. Kelesi jyly 1000 páter paıdalanýǵa berilmek. 2019 jyly biryńǵaı tıpte salynatyn 73 jeke turǵyn úıdiń qurylysy aıaqtalady. Basqarmanyń málimetinshe, olardyń barlyǵyn «7-20-25» baǵdarlamasy boıynsha saýdalaýǵa múmkindik te bar. Búgingi kúni oblys ortalyǵynda turǵyn úı kezeginde 25 myń adam tur, «Turǵyn úı qurylys jınaq banki» AQ-da 50 myń salymshynyń shoty bar.
Farıda BYQAI,
«Egemen Qazaqstan»
Pavlodar
