Sýret Prezıdenttiń baspasóz qyzmetinen alyndy
Rásim barysynda N.Nazarbaevqa Qytaı Halyq Respýblıkasynyń Tótenshe jáne ókiletti elshisi Chjan Sıao, Ispanııa Koroldiginiń Tótenshe jáne ókiletti elshisi Davıd Artýro Karrıedo Tomas, Izraıl memleketiniń Tótenshe jáne ókiletti elshisi Lıat Vekselman, Slovakııa Respýblıkasynyń Tótenshe jáne ókiletti elshisi Mılan Kollar jáne Eýropa odaǵynyń Tótenshe jáne ókiletti elshisi Sven-Olov Karlsson senim gramotasyn tapsyrdy.
«Sizderdiń mıssııalaryńyzdyń bastalýy el damýynyń mańyzdy kezeńimen tuspa-tus kelip otyr. Bizdiń strategııalyq baǵytymyz – álemniń ozyq damyǵan 30 eliniń qataryna qosylý. Osyǵan oraı, qajetti baǵdarlamalardyń bárin qabyldap, keshendi reformalardy júzege asyryp kelemiz», dedi Memleket basshysy.
Budan keıin Elbasy Qazaqstanda atqarylyp jatqan jumystarǵa toqtalyp, elshilerge mańyzdy máselelerdi tanystyra ketti. Sondaı-aq saıası-ekonomıkalyq, rýhanı jańǵyrý elimizdiń jahandyq básekege qabilettiligin arttyrý maqsatynda halyqqa Joldaý jarııalaǵanyn jetkizdi.
Prezıdent álemdik daǵdarys kúsheıgen jaǵdaıda senimdi memleketaralyq qatynastar ornatýdyń mańyzdy ekenin aıtty. «Jaqynda Nıý-Iorkte ótken Birikken Ulttar Uıymy Bas Assambleıasynyń kezekti sessııasynda keıbir elder arasynda «senim daǵdarysynyń» odan ári órshı túskeni anyq baıqaldy. О́zara senim ornyqpasa, daǵdarysqa qarsy kez kelgen is-qımyldyń oń nátıjesi bolmaıdy», dedi.
Memleket basshysy halyqaralyq jáne óńirlik qaqtyǵystardy retteý úshin Qazaqstannyń júrgizip otyrǵan kópvektorlyq saıasaty men kúsh-jigeriniń tıimdiligin atap ótti. Sonymen qatar Qazaqstan BUU Qaýipsizdik keńesiniń turaqty emes múshesi retinde álemdegi qaýipsizdikti saqtaýǵa óz úlesin qosyp otyrǵanyn basa aıtty.
Elbasy Qazaqstan men Qytaı arasyndaǵy qarym-qatynastardyń qazirgi jaǵdaıy men damý perspektıvalaryna arnaıy toqtaldy.
«Qazaqstan Qytaımen jan-jaqty strategııalyq yntymaqtastyqty damytýǵa erekshe mán beredi. Dıplomatııalyq baılanys ornaǵan sátten bastap biz tatý kórshilik jáne ózara túsinistik rýhynda damyp kele jatqan memleketaralyq qatynastardyń úlgili modelin qurdyq. Búginde eki eldiń úkimetteri ózara kelisimderdi júzege asyrý úshin belsendi jumys atqarýda. «Nurly jol» jańa ekonomıkalyq saıasatyn «Jibek jolynyń ekonomıkalyq beldeýi» bastamasymen ushtastyrý jónindegi yntymaqtastyqqa erekshe kóńil bólinip otyr», dedi Memleket basshysy.
Sondaı-aq N.Nazarbaev bıyl elimizdiń Eýropa odaǵymen dıplomatııalyq baılanys ornatqanyna 25 jyl tolǵanyn atap ótip, ózara qarym-qatynas syndarly dıalogqa negizdelgenin jetkizdi.
«Qazirgi basty mindetimiz – 2015 jyly qol qoıylǵan Qazaqstan men Eýroodaq arasyndaǵy Keńeıtilgen áriptestik pen yntymaqtastyq týraly kelisimdi júzege asyrý. Sondaı-aq Brıýsseldiń Ortalyq Azııa elderine qatysty jańa strategııasyn ázirleýge kúsh jumyldyrý kerek. Biz Qazaqstan men Eýroodaq arasyndaǵy vızalyq rejimdi jeńildetý máselesi durys sheshimin tabady dep senemiz», dedi Prezıdent.
Rásimge qatysýshylar aldynda sóılegen sózinde Memleket basshysy Qazaqstan men Ispanııa arasyndaǵy qatynastardyń strategııalyq sıpatyn atap ótti.
«2017 jyly maýsym aıynda Uly Mártebeli Ispanııa Koroli VI Felıpe Qazaqstanǵa alǵashqy resmı saparmen kelip, EKSPO-2017 halyqaralyq kórmesiniń ashylýyna qatysty. О́zara kelisimdi júzege asyrýǵa Ekonomıka jáne ónerkásip salasyndaǵy yntymaqtastyq týraly úkimetaralyq komıssııa men Iskerlik keńes zor úles qosyp keledi», dedi.
Budan keıin Elbasy ekonomıkanyń túrli sektorynda Qazaqstan men Izraıl arasyndaǵy qatynastardy odan ári damytýǵa múddeli ekenin bildirdi. «2016 jyly Izraıl Premer-mınıstri Bınıamın Netanıahýdyń Qazaqstanǵa resmı sapary jáne sonyń barysynda ótken bıznes-forým ózara yqpaldastyǵymyzdyń aıasyn keńeıtýge tyń serpin berdi. Biz ózara qatynastarymyzdy, ásirese aýyl sharýashylyǵy, ınnovasııalyq tehnologııalar jáne densaýlyq saqtaý salalaryn odan ári damytýǵa múddelimiz», dedi Memleket basshysy.
Sondaı-aq Slovakııamen yntymaqtastyqtyń oń qarqynyn atap ótip, eki el arasyndaǵy saýda aınalymyn arttyrýdyń jáne ekonomıkalyq yntymaqtastyqtyń jańa baǵyttaryn damytýdyń mańyzdy ekenin aıtty.
«Saýda-ekonomıkalyq baılanystardy nyǵaıtýǵa Ekonomıkalyq jáne ǵylymı-tehnıkalyq yntymaqtastyq jónindegi úkimetaralyq komıssııa zor úles qosyp keledi. Bolashaqta bizge taýar aınalymyn ulǵaıtyp, ózara ekonomıkalyq qatynastardy damytýdyń jańa baǵyttaryn aıqyndaý qajet», dedi N.Nazarbaev.
Rásim sońynda Memleket basshysy dıplomattardy Qazaqstandaǵy jaýapty mıssııalarynyń bastalýymen taǵy da quttyqtady.
Abaı ASANKELDIULY,
«Egemen Qazaqstan»
