Bıyl 5 qazanda Memleket basshysy Qazaqstan halqyna arnaǵan jyl saıynǵy Joldaýynda elimizdi jańǵyrtýdyń jańa kezeńinde qazaqstandyq bilim berý júıesiniń aldynda turǵan birqatar ózekti máselelerdi qozǵady. Olardyń qatarynda — mekteptegi jáne mektepke deıingi bilim berý sapasyn arttyrý, balalar qaýipsizdigin qamtamasyz etý, qoǵamdaǵy pedagog mártebesi men rólin arttyrý, mektepterdiń qurylysyn eldi mekenderdi damytý josparlarymen ushtastyrý jáne t.b.
Mektepke deıingi tárbıe jáne bilim berý
Bilim jáne ǵylym mınıstri E. Saǵadıev mektepke deıingi tárbıe men bilim berý salasynda 3–6 jas aralyǵyndaǵy balalar 93% qamtylǵanyn aıtty. Balabaqshalarǵa joldama berýdiń avtomattandyrylǵan júıesi engizildi. Búginde respýblıka boıynsha 69,5% avtomattandyrylǵan. Balabaqshalardyń 58%-ynda beınebaqylaý kameralary ornatylǵan.
«Elbasy úsh jyl ishinde búkil mektepter men balabaqshalardy beınebaqylaý kameralarymen qamtamasyz etýdi tapsyrdy. Mınıstrlik óz tarapynan aı saıyn monıtorıng júrgizip, aqparatty jarııalap otyrady», — dedi E. Saǵadıev.
Mektepke deıingi bilim sapasyn jaqsartý úshin balabaqshadaǵy pedagog mamandardyń bilim sapasyn arttyrý qajet. Mınıstrdiń aıtýynsha, Memleket basshysynyń tapsyrmasyna sáıkes ákimdiktermen birlesip, bıyl Jol kartasy bekitiledi, onda mektepke deıingi tárbıeshilerdiń biliktiligin arttyrý, biryńǵaı biliktilik talaptaryn engizý sharalary qaralyp, eńbek aqysyn tóleý júıesi qaıta qarastyrylatyn bolady.
Orta bilim berýde, mınıstrdiń aıtýynsha, Memleket basshysynyń tapsyrmasy boıynsha «Pedagog mártebesi týraly» zań ázirlenedi. Zańda pedagogtardyń áleýmettik mártebesin kóterý, oqý júktemesin qysqartý, qajetsiz tekserýlerden qorǵaý normalary qarastyrylady. Zańdy 2019 jyly bekitý josparlanǵan. Bıyl osy zań ázirlenip, qoǵamdyq talqylaý prosesinen ótetin bolady.
Orta bilim berý
E. Saǵadıevtiń aıtýynsha, apatty mektepter men úsh aýysymda oqytý máselelerin sheshý maqsatynda búginde respýblıka boıynsha 60 mektep salynyp jatyr. 11 mekteptiń qurylysyna respýblıkalyq bıýdjetten qarajat qarastyrylǵan, respýblıkalyq bıýdjet esebinen 27 mektep salynýy tıis — QR BǴM derekterine sáıkes, atalǵan mektepter men jańa úsh aýysymdy mektepter boıynsha apta ishinde ulttyq baza tolyqtaı qalyptastyrylady. 50 mlrd qarajat eń aldymen osy mektepterge jumsalatyn bolady. Bilim jáne ǵylym mınıstriniń aıtýynsha, qalǵan úsh aýysymdy mektepter jergilikti bıýdjet qarajaty esebinen salynýy tıis.
«Elbasy tapsyrmasynyń aıasynda mektep salý prosesin “7-20-25” jáne “Nurly jer” turǵyn úı salý baǵdarlamalarympen sáıkestendirý qajet. Osyǵan oraı óńirler jańa turǵyn-úılerdi mekteptermen qamtamasyz etý normalaryn engizýi jáne jekemenshik kompanııalarǵa mektepterdi salý úshin jeńildikpen nesıe berý júıesin qarastyrýy qajet», — dedi E. Saǵadıev.
Mektepterdegi psıhologtar sanyn ulǵaıtyp, olardyń biliktiligin arttyrý maqsatynda QR BǴM shetelden mamandardy tartý arqyly «Baqytty otbasy» baǵdarlamasy boıynsha jumys júrgizdi. Jumys ári qaraı jalǵasyn tappaq, Mınıstrlik biryńǵaı baǵdarlama daıyndaıdy. Budan ózge ulttyq testileý engiziledi, barlyq oblysta psıhologtardyń biliktilikterin arttyrý kýrstary ótkiziledi. Buǵan qosa, attestasııalaýdyń jańa júıesi men kásibı quzyretine baılanysty test alýy arqyly pedagog-psıholog mamandardyń eńbekaqysy men sanatyn arttyrýdy qarastyrý kózdelgen. Bıyl jańa júıe ázirlenip, Úkimettiń qaraýyna jiberiledi.
Sonymen qatar, bilim jáne ǵylym mınıstri E. Saǵadıev otyrys barysynda qoıylǵan suraqtarǵa jaýap bere otyryp, bilim berýdiń jańartylǵan mazmuny boıynsha júrgizilip jatqan túsindirý jumystary týraly baıandady. QR BǴM málimetine sáıkes, qazirgi tańda balalardyń 70% jańartylǵan baǵdarlamalar boıynsha bilim alyp jatyr. Ata-analar bárin jaqsy túsinedi, muǵalimder jumysqa daıyn. Sondaı-aq, elektrondyq oqýlyqtardy engizý jumystary júrgizilip jatyr. Keıbir pánderdiń oqýlyqtary elektrondy nusqasynda bar, olardy oqýshylar belsendi túrde qoldanyp júr. QR BǴM jospary boıynsha, eki jyl ishinde mektepterdiń 100% elektrondy oqýlyqtarmen qamtamasyz etiledi. Buǵan qosa, oqýshylarǵa qolaıly jaǵdaı jasaı úshin mektepterde shaǵyn shkaftar qoıý máselesi pysyqtalyp jatyr.
Máseleni qaraý barysynda óńirlerde bilim berý sapasyn arttyrý, ınfraqurylymdy jaqsartý, úsh aýysymda oqytýdy azaıtý jáne jańa mektepter salý boıynsha atqarylyp jatqan jumystar týraly Aqtóbe oblysynyń ákimi B. Saparbaev, Almaty oblysynyń ákimi A. Batalov, Mańǵystaý oblysynyń ákimi E. Toǵjanov, Atyraý oblysynyń ákimi N. Noǵaev, Túrkistan oblysynyń ákimi J. Túımebaev, Jambyl oblysynyń ákimi A. Myrzahmetov, Qostanaı oblysynyń ákimi A. Muhambetov, Soltústik Qazaqstan oblysynyń ákimi Q. Aqsaqalov baıandady.
