Joldaý boıynsha ótken májiliste Túrkistan oblysynyń ákimi Janseıit Túımebaev tıisti basqarmalarǵa joǵaryda aıtylǵan jáne basqa da naqty tapsyrmalar júktedi. Mysaly, ózekti ınfraqurylymdyq máseleler tizimin jasap, jobalardy qarjylandyrý kózin qarastyrýdy, al oblystyq aýyl sharýashylyǵy basqarmasyna eńbek ónimdiligin jáne qaıta óńdelgen ónim eksportyn kóbeıtý boıynsha naqty sharalardy júzege asyrýdy tapsyrdy. Májiliste negizgi alty baǵyttan turatyn saıası qujattyń máni men maǵynasyna jeke-jeke toqtalyp, ondaǵy mindetterdi óńirde atqarylyp jatqan jumystarmen baılanystyra baıandaǵan J.Túımebaev Elbasy kásipkerlikti qoldaý maqsatynda qol qoıǵan «Túrkistan» erkin ekonomıkalyq aımaǵyn qurý týraly Jarlyqtyń oblys ekonomıkasyna tyń serpilis ákeletinin atap ótti.
«Elbasy aıryqsha toqtalǵan mindetterdiń biri – týrızm salasyn damytý. Bıylǵy jarty jyldyń ózinde Túrkistanǵa 720 myńǵa jýyq adam saparlady. Bul kórsetkish ótken jylmen salystyrǵanda 57,2 prosentke ósti. Jaqyn arada oblys ortalyǵyna keletin mıllıonynshy týrısti kútetin bolamyz. Túrkistan oblysynda týrızmdi keshendi damytý maqsatynda 2018-2025 jyldarǵa arnalǵan týrıstik ındýstrııany damytý tujyrymdamasy ázirlendi. Keshendi sharalardyń nátıjesinde oblysqa keletin sheteldik týrısterdiń sanyn 5 mıllıonǵa jetedi dep kútilýde», dedi J.Túımebaev. Sondaı-aq oblys ákimi ınvestısııa tartýda syrttan kútpeı, otandyq ınvestorlardyń múmkindigin paıdalaný, jerdi tıimdi qoldaný qajettigin aıtyp ótti. Eńbek ónimdiligi boıynsha da Elbasynyń syn-eskertpelerinen qorytyndy shyǵarý, maqsattary bir bolǵanymen ótkizý mezgilderi men formattary ózgesheleý jınalystardy azaıtý qajet. Elbasy Joldaýynda aıtylǵan agroónerkásip kesheniniń áleýetin tolyq júzege asyrý máselesine toqtalǵan oblys ákimi óńir ekonomıkasynyń draıveri bolyp tabylatyn aýyl sharýashylyǵynyń jalpy ónim kólemi 250 mlrd teńgege jetip, ótken jyldyń sáıkes kezeńimen salystyrǵanda 103,6% bolǵanyn atap ótti. Sonymen birge óńirdiń aldaǵy damý josparlarymen bólisti.
Memleket basshysynyń saıası qujatyndaǵy mindetterdi nasıhattaý, júzege asyrý joldaryna qatysty qoǵam qaıratkeri Orynbaı Rahmanberdıev, Q.A.Iаsaýı atyndaǵy halyqaralyq qazaq-túrik ýnıversıtetiniń dosenti, tarıh ǵylymdarynyń doktory Tursyn Mahanuly, «Bórte Mılka» kásipornynyń quryltaıshysy, oblystyq máslıhat depýtaty Nuraly Ábishev, Saıram aýdandyq qoǵamdyq keńes tóraǵasy, ardager ustaz Amangeldi Qabylbekov, Qazaqstan ózbekteri «Dýstlık» qaýymdastyǵynyń tóraǵasy Ikram Hashımjanov jáne Q.A.Iаsaýı atyndaǵy halyqaralyq qazaq-túrik ýnıversıtetiniń 4-inshi kýrs stýdenti, «Túrkistan stýdentteri alıansy» qoǵamdyq birlestiginiń múshesi Alýa Tursynhan minberge shyǵyp, óz oılaryn ortaǵa saldy.
Aktıv sońynda J.Túımebaev Elbasy Joldaýynda atap kórsetilgen máselelerdi negizge ala otyryp, eń aldymen, onyń tıisti deńgeıde túsindirilip, BAQ-ta nasıhattalýyn oblystyq ishki saıasat basqarmasyna tapsyrdy. Nasıhattaý sharalary, sondaı-aq, oblystyq bilim, otbasy, balalar jáne jastar isteri jónindegi basqarmalary men aýdan, qala ákimdikterine, «Nur Otan» partııasy oblystyq fılıalyna da júkteldi.
Ǵalymjan ELShIBAI,
«Egemen Qazaqstan»
Túrkistan oblysy
