Joldaýda otandyq ónimdi arttyryp, eksportqa kóńil bólý tapsyryldy. О́tken jyly et eksporty boıynsha respýblıkalyq kórsetkishtiń 40 prosentin, ıaǵnı jartysyna jýyǵyn Aqjaıyq óńiri atqarǵan. 1300 tonna sıyr eti shetelge, atap aıtqanda Reseı, Armenııa, Iran jáne Aýǵanstan memleketterine shyǵaryldy. Qoı etin eksporttaý jospary 2,5 esege artyq oryndalyp, 500 tonnaǵa jýyq et shetelge satyldy.
– Biz munymen shektelmeımiz. Sebebi jańa Joldaý qosymsha múmkindikter týdyryp otyr. Elbasynyń tapsyrmasyna sáıkes óńirdegi ırrıgasııalyq qurylymdar júıesin jańarttyq. 4 iri joba júzege asyrylyp, sýarmaly jerler 70 myń gektarǵa keńeıdi. Osynyń nátıjesinde mal sharýashylyǵymen aınalysatyn qojalyqtar kóbeıe bastady. Sharýa qojalyqtarynyń sany 2017 jyly 5 myń bolsa, bıyl 6500-den asty, – dedi oblys ákimi Altaı Kólginov.
О́ńir basshysy óziniń sózinde toqtap turǵan jobalarǵa ınvestor tartylyp, jańadan taǵy 10 myń bas mal bordaqylaıtyn alańdar salý josparlanǵanyn aıtty. Búginde óńirdegi ıgerilmeı jatqan 1 mln gektar jer memleket menshigine qaıtarylyp, onyń jartysy isker azamattarǵa qaıta berilgen. Qolǵa alynǵan 12 ınvestısııalyq jobanyń teń jarymy sheteldikterdiń qatysýymen júzege asýda. Bilim salasynda óńirdegi jeke balabaqshalardyń sany 24-ten 52-ge kóbeıip, 3 jastan 6 jasqa deıingi balalardy mektepke deıingi bilimmen qamtý 100 prosentti qurady.
Sıfrlandyrý aıasynda qaladaǵy balabaqsha kezegi tolyqtaı elektrondy kezek júıesine kóshirildi. Jyl sońyna deıin barlyq aýdan ortalyǵy osy júıege ótedi.
Jalpy, oblys ákimi aktıv aldynda óńirde alda qolǵa alynatyn jobalar týraly keńinen aıtyp berdi. Osy jıynda sóz alǵan «Stroıkombınat» JShS dırektory Baqytjan Nurbaev 2019 jyldyń qańtarynan bastap kompanııa qyzmetkerleriniń jalaqysy ósetinin habarlady. Otandyq óndirýshiler memleket qoldaýyn anyq sezinip otyr. О́ńirdegi temirbeton rezervýarlardyń 90 prosentin bizdiń kompanııa shyǵarady. Jylyna 2 mlrd teńgeniń ónimin óndirip, el qazynasyna 200 mln teńge salyq túsimin quıdyq. О́ńirdegi jol qurylysynyń damýy, memlekettik 7 – 20 – 25 baǵdarlamasy bizdiń kompanııanyń júıeli tapsyrys alyp, qalypty jumys isteýine múmkindik berip otyr» deıdi Baqytjan Nurbaev.
«Medısınalyq ortalyq» JShS dırektory Rafhat Istaev óńirdegi medısına qyzmetkerleri atynan Prezıdent Joldaýynan týyndaıtyn maqsat-mindetterdi júzege asyrýǵa daıyn ekendigin bildirdi. Ýchaskelik dárigerler men medbıkeler jalaqysynyń ósýi, qaǵazbastylyqtan arylý – dárigerlerdiń kópten kútken jańalyǵy edi. Sonymen birge óńirdegi medısınalyq mekemeler osy zamanǵy eń ozyq qural-jabdyqtarmen jaraqtanyp jatyr. Endi buǵan medısına qyzmetkerleriniń kásibı biliktiligi saı kelip, halyq densaýlyǵy úshin aıanbaı qyzmet etýi tıis.
Oral qalasyndaǵy №17 orta mektep dırektory Tamara Rýdıch Prezıdenttiń bıylǵy Joldaýy bilim salasy qyzmetkerleri úshin qýanyshty jańalyqqa toly bolǵanyn aıtty.
Budan keıin minbege «Sábıt» sharýa qojalyǵynyń jetekshisi Erbolat Qurmanǵalıev, jeke kásipker Saıan Baetov shyǵyp, ózderi aralasyp júrgen aýyl sharýashylyǵy salasyndaǵy is-tájirıbesimen bólisti. Sóz alýshylardyń bári de Prezıdenttiń jańa Joldaýy el ekonomıkasy men áleýmettik jaǵdaıyn kóterýge tyń serpin beretinin basa aıtty. Jıyn sońynda oblys aktıvi jınalysynyń qarary qabyldandy.
Qazbek QUTTYMURATULY,
«Egemen Qazaqstan»
Batys Qazaqstan oblysy
