Forýmda sóz alǵan Premer-Mınıstr Baqytjan Saǵyntaev Serbııa men Qazaqstan arasyndaǵy dostyq qarym-qatynastyń turaqty ekenin aıta kelip, agroónerkásiptik keshen, hımııa, týrızm, medısına, kólik, telekommýnıkasııa sııaqty salalardyń damý áleýmeti joǵary ekenin jetkizdi.
− Ekonomıkalyq áleýeti joǵary Serbııa Qazaqstannyń Eýropadaǵy senimdi seriktesi. Biz Serbııanyń basty halyqaralyq bastamalarymyzdy jan-jaqty qoldaýyn joǵary baǵalaımyz. Saýda-ekonomıkalyq saladaǵy yntymaqtastyqta nyǵaıyp keledi. О́tken jyly Qazaqstan men Serbııa arasyndaǵy taýar aınalymy 59 prosentke ósti. Prezıdent myrzamen ekijaqty kelissózder barysynda bıznestegi qarym-qatynastarymyzdy barynsha joǵary deńgeıge kóterýge bolatyn túrli baǵyttardy talqyladyq, – dedi B.Saǵyntaev.
Al Serbııa Prezıdenti Aleksandr Výchıch qazaqstandyq kásipkerlerdi óz eline ınvestısııa quıýǵa shaqyrdy.
− Biz erkin saýda aımaǵy týraly kelisimge túzetý engizý baǵytynda jumys istep jatyrmyz. Áriptesterimizden qus eti, irimshik, temeki jáne ózge de taýarlardy qosa alǵanda EAEO naryǵynda birneshe taýarlyq pozısııada kedensiz ımportty qamtamasyz etýdi surap otyrmyz. Sonymen qatar 5 myń avtomobıl kvotasy jaıynda da aıttyq. Keleshekte yntymaqtastyq úshin úlken keńistik tabamyz dep úmittenemiz. Aýyl sharýashylyǵy salasynda aýqymdy bastamalardy júzege asyrýǵa nıettimiz, – dedi Serbııa Prezıdenti. Sonymen qatar mártebeli meıman áskerı-tehnıkalyq salada da eki el birlese jumys isteı alatyndyǵyn basa aıtty.
− Qazaqstandyq ınvestorlardyń elimizge kelgenin qalaımyz. Sońǵy úsh jylda Doing-business tiziminde birshama joǵaryladyq. Úsh jyl qatarynan bizde bıýdjettiń artylýy oryn alýda. Bıýdjetinde profısıt baıqalǵan eýropalyq elderdiń sany az, – dedi Aleksandr Výchıch. Serbııa Prezıdenti qazaqstandyq kásipkerlerdi týrızm, qonaqúı bıznesi sııaqty salalarǵa shaqyrdy.
− Sizder barynsha qolaıly jaǵdaı men memlekettik sýbsıdııaǵa ıe bolasyzdar. Sýbsıdııany jańa jumys oryndarynyń sany boıynsha beremiz, ony usynýdyń túrli deńgeıleri men tásilderi bar. Birlesken kásiporyn qurý arqyly biz úlken naryqty baǵyndyra alamyz. Máselen, sizder úshin batyseýropalyq, al biz úshin eýrazııalyq naryqqa shyǵý múmkindigi bar, – dedi Serbııa Prezıdenti Aleksandr Výchıch.
Bıznes-forýmǵa agroónerkásiptik keshen, hımııa, týrızm, medısına, kólik, telekommýnıkasııa sekildi salalardaǵy serbııalyq taraptyń 100-ge jýyq bıznes ókilderi qatysty. Serb kompanııalary arasynda Algotech (telekommýnıkasııa), Chemical Agrosava (hımııa), Akomed (medısınalyq jabdyqtar óndirisi), Adanko (toqyma), Meat ING Belgrade (aýyl sharýashylyǵy), Veterınarlyq medısına ınstıtýty, Belgrad áýejaıy sııaqty bıznes ortalyqtary bar.
Shara barysynda 4 vedomstvoaralyq memorandýmǵa qol qoıyldy. Olar: Qazaqstan Respýblıkasy Investısııalar jáne damý mınıstrligi men Serbııa Respýblıkasynyń Qurylys, kólik jáne ınfraqurylym mınıstrligi arasyndaǵy áýe tasymaly salasyndaǵy ózara túsinistik týraly memorandým; Qazaqstan Respýblıkasy Investısııalar jáne damý mınıstrligi men Serbııa Respýblıkasynyń Qurylys, kólik jáne ınfraqurylym mınıstrligi arasyndaǵy qurylys salasyndaǵy yntymaqtastyq jáne tájirıbe almasý týraly memorandým; Qazaqstan Respýblıkasy Áleýmettik damý mınıstrligi men Serbııa Respýblıkasynyń Jastar jáne sport mınıstrligi arasyndaǵy Jastar saıasaty salasyndaǵy ózara túsinistik týraly memorandým; Qazaqstannyń «Veterınarlyq medısına ulttyq anyqtamalyq ortalyǵy» RMK men Serbııanyń ǵylymı veterınarlyq ınstıtýty arasyndaǵy yntymaqtastyq týraly memorandým.
Erkejan AITQAZY,
«Egemen Qazaqstan»
