Is-sharaǵa Parlament Senaty men Májilis depýtattary, ǵalymdar, óner qaıratkerleri qatysty. Ǵalymnyń mereıtoıyna arnalǵan sharadan ádebıetsúıer qaýym men til janashyrlary da shet qalǵan joq.
Konferensııanyń plenarlyq bóliminde L.N. Gýmılev atyndaǵy EUÝ áleýmettik-mádenı damý jónindegi prorektory, akademık Dıhan Qamzabekuly kirispe sóz sóılep, EUÝ-dyń rektory Erlan Sydyqovtyń atynan mereıtoı ıesin quttyqtady. Sonymen qatar Memlekettik hatshy Gúlshara Ábdiqalyqova, Prezıdent Ákimshiliginiń Ishki saıasat bóliminiń basshysy Aıda Balaeva, Parlament Senatynyń tóraǵasy Qasym-Jomart Toqaev atynan kelgen quttyqtaýlardy oqyp berdi. Jıynda EUÝ qazaq ádebıeti kafedrasynyń meńgerýshisi, akademık Seıit Qasqabasov arnaıy sóz alyp, kórnekti ǵalymnyń eńbekteri men adamı qasıetterine toqtalsa, Astana qalasy ákiminiń orynbasary Ermek Amanshaev qala ákimi Baqyt Sultanovtyń jyly lebizin jetkizdi. Al «Egemen Qazaqstan» gazetiniń basshysy Darhan Qydyráli basylymnyń turaqty avtoryn mereıli jasymen quttyqtap, ǵylymdaǵy eńbegi men qyzmetine toqtaldy.
EUÝ qazaq ádebıeti kafedrasynyń ustazy, fılologııa ǵylymynyń doktory A.Áltaı «Zaman jáne rýhanııat: jyraýlar, bıler, sal-seriler» taqyrybynda bas baıandama jasady. Qazaq Ulttyq óner ýnıversıtetiniń professory, kúıshi-kompozıtor J.Júzbaı «Professor S.Negımovtiń ıntonasııa jáne melodıka týraly paıymdaýlary», «Bolashaq» akademııasynyń professory M.Hamzın «Professor S.Negımov zertteýlerindegi Arqa aqyndary shyǵarmashylyǵy», ál-Farabı atyndaǵy QazUÝ professory T.Esembekov «S.Negımov eńbekterindegi etnografııalyq saryndar: tulǵa, qoǵam, adam», EUÝ qazaq ádebıeti kafedrasynyń professory, fılologııa ǵylymynyń kandıdaty Q.Alpysbaev «Professor S.Negımov jáne ulttyq poetıka: metafora qubylysy», EUÝ qazaq ádebıeti kafedrasynyń professory, fılologııa ǵylymynyń doktory R.Turysbek «Ult muratynyń kórkemdik qaınary», jazýshy A.Kemelbaeva «Nazym sózdiń kenishi», EUÝ qazaq ádebıeti kafedrasynyń professory, fılologııa ǵylymynyń doktory S.Jumaǵul «О́leń – sózdiń teorııasy», EUÝ dosenti, fılologııa ǵylymynyń kandıdaty M.Bóribaeva «Mádenıet jáne dáýir» degen taqyryptarda baıandamalaryn oqydy.
Konferensııaǵa qatysýshylar jıyn barysynda mereıtoı ıesiniń shyǵarmalary negizinde uıymdastyrylǵan «Kúltegin» atrıýmyndaǵy «Ǵalym.Ustaz.Qaıratker» kórmesin tamashalap, Serik Negımovtiń «Folıant» baspasynan jaryq kórgen bes tomdyq shyǵarmalar jınaǵynyń tusaýkeser rásiminiń kýási boldy.
Baǵashar TURSYNBAIULY,
«Egemen Qazaqstan»
